金融High Tea 2013年1月11日
金融High Tea——群魔小舞
2013年1月11日
美國鋁業睇好今年中國需求，惹起老外對紅色股憧憬更大，同行中國鋁業(2600)自然大受其惠，股價彈升6.5%，港股早段隨着內地公佈出口數字理想，在早上9點半後唔夠一個鐘從低位彈升312點，後來升幅略為回順，全日升136點至23354點，而國企指數升114點，升幅仲大，大市成交大幅增加至928億元，紅色股甚有炒味。
本地股主要炒地產股，表面睇係因為九肚山一幅豪宅地皮由田大少的萬泰同永泰(369)投得，地價比買家印花稅推出前區內地皮的地價更高，所以地產股炒起，如長實(001)升1.9%，收127.1元，佢同新地(016)、新世界(017)和信置(083)齊上52周新高。
新世界食正條水
我同中環茶友傾起，話地產股咁升唔止九肚山地價貴的問題，而係現在傳吓傳吓，都傳出下星期振英哥公佈的《施政報告》在土地、樓市方面無料到，唔止無新打擊措施，連搵地起樓都無乜驚人之舉，所以地產股實行偷步炒上，你睇有梁粉地產股之稱的新世界昨日無情情大升5.4%，講理由無乜明顯理由，只係覺得振英無招佢特別受惠，新世界早前執到市建局波鞋街個筍盤，樓市後市向好，佢又同政府關係好，仲有排炒喎。
昨日大市升唔多，但好多紅色股都勁有炒味，例如一大堆新能源股都炒到七個一皮，佢哋都衰咗好耐，以風電股計，例如隻中國高速傳動(658)好多散戶高位揸咗坐晒艇，叫佢「中國高速全凍」，昨日發威啦，大升13.6%，另外，中國風電(182)升7.8%、金風(2208)抽高8.8%。
有茶友話群魔亂舞，我話呢啲股衰咗好耐，家資金入場炒反彈，升幅誇張，但舊年高位都未到，只算做群魔小舞。但到股票一日升3、5、7%時，風險自然加大，好似食太陽能股保利協鑫(3800)咁，近日好炒得，已升咗幾日，昨日最高又升上2.22元，升咗8.8%，但之後就急回，最低倒跌1.5%，單日來回近10%，最後彈番少少，升2%收場，高位摸咗，若10%止蝕，差啲即日打靶，所以市升得急時，追貨風險同時提升。
出口升短炒航運
昨日中國公佈12月新增貸款4540億元人仔，比市場預期的5500億低，但市場無負面反應，因為12月出口升14.1%，市場只預有5%，實際數字是意外高位，亦遠比11月的3%增長高，搞到航運股如飲狂藥，最勁係中國遠洋(1919)升7.3%。
踏入2013年，中國各地開始規劃新的一年，GDP目標再次成為焦點，但不再舉出口拉動(航運股宜短不宜長)。在中央高舉十年內可以拉動40萬億投資者「城鎮化」大旗的帶動下，好多城市，特別是省會城市，對當地今年經濟增長異常樂觀，普遍的GDP增長目標定在12%左右。而「食胡」的牌，家家都係「加大投資」，多個城市的預期完成投資總額佔了GDP總量的一半或以上。但著名經濟學家吳敬璉已經大潑冷水，在國際金融論壇上指出，「據不完全統計，為了保增長，各地作出的投資規劃，已經達到了17萬億元，這是不可持續的，問題暴露得很明顯。」即係話地方投資計劃講得太大。
證券界估計得實際一啲，摩根大通全球市場業務主席李晶預計，城鎮化將成為內地經濟增長的動力，固定資產投資和消費將拉動經濟主要動力，但出口則不會為經濟增長帶來太大正面貢獻。估計2013年中國經濟增長將達到8%，並預計今年中國央行將會削減存款準備金率兩到三次。由於通脹平穩，中央將維持利率不變。
陸羽仁
上一頁 下一頁
金融High Tea 舊文