金融High Tea 2013年1月29日
金融High Tea——大象不笨
2013年1月29日
■國際主要經濟體仍保持寬鬆貨幣及超低利率政策，新水流入，造就近期人民幣匯率走勢偏強。新華社
■中移動生意唔憂做，業務成熟反而係最大憂慮，未來唔好講話增長，要維持都唔易。新華社
美股連升第八日，內地A股唔輸蝕，昨日由頭升到尾，上證綜指大漲2.4%，成交比較弱些，上海深圳總成交量仍有2080億元。中國外匯管理局指，近期人民幣匯率走勢偏強，一定程度上係從去年第四季開始，買空人民幣的投資者轉為造好所致。內地經濟回穩，人民幣貶值和資本流出壓力降低，國際主要經濟體仍保持寬鬆貨幣及超低利率政策，持續推高全球流動性，令市場風險胃納不斷提升，刺激了國際套利資本流向內地。有新水流入，股市好難唔升。
港股相對起中美股市，表現比較弱雞。恒指朝早最多升逾150點，之後逐步回順至收市，收23672，升91點。國企股表現較好，升上12100點上方。大市成交縮水至675億元。
升市成交未配合
海通潘鐵珊話，最近兩個月本地資金流出現變化，此前兩年由於港息比較低，私人銀行、國行及大客戶都在從事套息操作。過去一年任債券成交量遠比股市的高。至去年底，債券市場起泡情況好嚴重，債息向下，吸引力開始下降。好多資金轉入股市，所以股市轉旺，佢估計恒指後市會升到26000點。
昨日，包括匯豐及中銀香港(2388)等15間香港銀行，簽署深圳前海跨境人民幣貸款協定，貸款規模為20億元人民幣，涉及26個項目。據悉，此次雙方簽約的利率，低過內地。目前，內地一年期基準貸款利率為6%，按照企業的信用等級可上浮下浮，企業中長期貸款最優惠利率在5.4%以上；香港離岸市場一年期人民幣貸款利率則在4%以下。
匯豐香港區總裁馮婉眉認為，前海開通跨境人民幣貸款，為人民幣國際化畫下重要的里程碑。人民幣融資渠道進一步開通會帶動人民幣貸款的發展，深化離岸人民幣市場。
匯控趕過中移動
中銀香港及匯控(005)昨日齊造好，齊升接近1%，匯控收87.3元，創了52周新高。
講開匯控，佢同中移動(941)兩隻重磅股，近日表現一強一弱。一年前匯控股價低過中移動，但追吓追吓，已經趕過咗941，而家仲有小小放離。
中移動係內地最大網絡商，生意唔憂做，佢最大憂慮係業務已經發展得好成熟，未來唔好講話增長，要維持都唔易，公司股價要靠派息撐住，所以一直無辦法擺脫90元關口阻力，每次衝破呢個位，就會借住些小事調整番落嚟。
相反，匯控舊年有唔少負面消息，包括係美英市場被政府調查，洗黑錢指控仲令到佢要賠償天文數字的金錢，但大笨象股價係不利消息下升吓又一浸，升升吓已經逼近90元水平，原因主要係西方金融市場去年第四季開始漸趨穩定，特別係美國樓市最近有輕微復甦跡象，雖然集團有被查同罰款等負面消息，但成個做生意環境好咗，對公司前景影響仲大，故此醒目資金埋位炒番轉。
匯控過去曾是港人至愛，但經歷近十年的低潮，已令不少粉絲死心，去年港股向好，但已少人聽到聖誕鐘、買匯豐的老調，反映投資者焦點已唔再集中係呢隻老牌藍籌身上。不過，牛市經常係投資者心灰意冷下誕生，散戶對匯控失去興趣，佢竟然暗暗發力，趕過了941，相信好多人事前都估唔到，大笨象呢次不笨，唔聲唔聲，嚇你一驚！
陸羽仁
上一頁 下一頁
金融High Tea 舊文