金融High Tea 2013年5月23日
金融High Tea——電力股災炒浪退
2013年5月23日
昨天黑雨得半日市，恒指回吐105點唔算太多，但好多電力股、新能源股、手機股都大幅回落，電力股更可以用小股災形容。公用股係拖低大市的元兇，恒生公用分類指數大跌2.6%，電力股及燃氣股齊齊腳軟。煤氣(003)跌0.9%，電能實業(006)跌4.4%。內地電力股更傷，除了傳聞內地擬限進口低卡煤，煤價料因供應量減少而上升，直接影響發電廠發電成本外，內地可能於第三季下調燃煤電廠電費每千瓦時0.008元(即約2%)。華潤電力(836)及大唐發電(991)齊跌超過4.5%，中國電力(2380)跌7.3%，華能(902)急插8.3%。
華電華能跳崖
不過電力股跌幅之冠是華電國際(1071)，昨日大插8.7%。花旗昨日出報告指華電國際毛利率為行業中最低，去年只有2.5%，每股盈測對減電價較同業更為敏感，每1%的電費下調，其2014年純利約減少4.38億人仔。花旗下調華電國際今明兩年的盈測13%及25%，評級由「買入」降至「沽售」，目標價由5.4元降至3.55元。由於華電國際估值於過去十二個月已上漲140%，建議投資者換馬到更穩健的同業，例如潤電。
睇返電力股隻隻差唔多，以華電計，去年11月仲係得2元，一級級炒上無回頭，到本周一炒上4.79元高位，半年升咗1.4倍，然後兩日兩枝大陰燭咁插低，兩日唔見咗15%，隻華能走勢亦差唔多，兩三日內跳崖下跌，令人擔心，電股呢個炒業績的炒浪，係唔係已經完結。
市場可能覺得調低電價會波及燃氣收費，中華煤氣(003)屬下主要經營內地業務的子公司港華燃氣(1083)跌2.1%，新奧能源(2688)最傷，插6.3%至41元。風電股龍源電力(916)亦跌3.5%，若果話風電股都要減電費又唔多似，因為佢哋有阿公電費幫補，若減電費除非阿爺貼番，太陽能股保利協鑫(3800)又跌3.1%更唔關事。
我話與其為咁多不同類型股份下跌找一個理由，不如話近日升得愈急的股份回得愈急，弄不好就係一個熱炒股的小股災。好似個舞會跳咗成晚，去到十一、二點，大家都有點累，一有人話走，其他人就搶住鬆人。這根本是炒浪退潮，所謂政策原因都只是借啲意而已。
好似隻中國無線(2369)，昨日一棍跌12.5%，收3.29元，你話有乜原因？未必有好特別原因，佢由2月2元左右起步，話炒手機股等等，上周末段炒上3.9元就穿唔到4元，兩個幾月升近1倍，然後昨日一棍插落嚟，當中獲利股咁多，一回就好多人走路。
長和除息前炒起
你問我呢啲股份後市點睇，大路估好可能見咗高位，至於會好急咁一直插，定係插一兩日又會大力彈一下，就好難講啦，但見佢反彈，可能係減倉機會，而唔係當無事再走去搶。咁多隻股一下子回得咁急，顯示市場上獲利貨唔少，人心亦較虛，有乜依郁，唔係咁易走也。
內地股唔掂，本地地產股反而逆市靠穩，恒生地產分類指數升0.4%。龍頭股長實(001)表現最好，連續兩日都係逆市向上，昨日再漲1.1%至118.6元。李超人昨日出席長實及和黃(013)股東會，指停售「雍澄軒」事件涉及賠償銀碼細，對長實影響輕微，強調以和為貴。換另一個角度，長實能夠快速解決事件，搶到投資者唔少分。同系的和黃亦漲1.3%至87.7元，係去年8月以來高位。兩隻嘢下周一除息，可能有啲人入市買貨博收息。以和黃計派息1.53元，都好和味也，但我唔喜歡除息前買股，反而認為若想沽貨是出手時機。
陸羽仁
上一頁 下一頁
金融High Tea 舊文