金融High Tea 2013年8月2日
金融High Tea——睇定無壞
2013年8月2日
踏入8月第一個交易日，阿爺即刻送股民大禮。中央終有刺激經濟政策出台，國務院昨日宣佈推出加強城鎮燃氣和北方採暖地區供熱管道、污水及垃圾處理、城市配電網、生態環境、地鐵、輕軌等市內公共交通系統建設、以及橋樑安全檢測加固等工程。有分析估計會拉動上萬億投資。
基建投資再加上內地7月份製造業採購經理指數(PMI)50.3%，較上月升0.2個百分點，好過市場預期。經濟有回升跡象，提振了市場投資氣氛。內地A股昨日明顯反彈。上證綜指重上2000點大關上，以全日最高位收市，收漲35點至2029點。
A股造好，帶挈港股有運行，恒指開市即收復22000點關，收市漲205點，收報22088點；國企指數升65點至9723點，跑輸恒指。升市主要由地產股帶動，內房股表現又好過本地地產股。
超人不現身 股民難問卜
長和系公佈中期業績，長實(001)半年純利134億元，少賺13%，仍然好過市場預期。每股溢利5.79元，派息0.58元。和黃(013)核心盈利120億元，增長24%，同樣好過市場預期的109億元。和黃每股基本盈利2.91元，派中期息每股60仙，去年增加9%。和黃靠穩，微升0.15元至87.7元。本地藍籌睇嚟有個好的開始。
今年長和業績取消記者會，傳媒無得直接向主席李嘉誠發問，想知佢點睇前景，只能看他在業績中的報告。長實持有和黃股權，但盈利仲係好依賴賣樓。李超人話，鑑於物業項目落成時間，料集團有較多項目將於今年年底或明年入帳，值得留意的是，他透露集團於上半年物業銷售成績，較去年同期為低。
講到樓市，佢話將適時擴展土地儲備，為未來發展建立基礎。香港樓市發展將繼續取決外圍經濟及本地房屋政策方向，集團將配合市況及房策發展在本港推展地產業務。
今年李超人唔出嚟見記者，有人話係鋪排逐步移交權力畀個仔，有人話係因為近年見記者，成日俾人用好尖銳的方式問佢唔想講的問題，於是索性唔見。茶友估計，兩個可能性都有，無論邊個原因都好，今次表達形式唔同咗，大家解讀都係靠估。
大財團唔再搶地
大地產商話樓市前景要睇住房策變化，房策話明要增加供應，咁大地產商係咪要減少買地來「配合」呢？茶友話，幾家龍頭大地產明顯係減少咗買地，好似昨日兩幅九肚山同大欖地皮，分別由香港興業同永泰投到。兩家公司好耐無投到地，今次終於「開齋」，永泰曾經係青山公路起過樓，對市況熟悉，用5億幾買塊地，屬於細細粒、容易食。
呢兩幅地皮面積唔算大，中小型發展商好啱胃口，但曾經何時，大地產商買地幾乎係大小通吃，現在就開始變得揀飲擇食，唔肯再出高價去爭地。從大地產商角度，自己手頭麵粉仲有好多，如果麵包繼續漲價，都唔驚無得賣，萬一麵包麵粉一齊跌價，咁就可以執平貨，如果推地多，但需求強功，出現麵粉跌價，麵包無跌價，咁就仲正。既然大把子彈係手，觀望下先絕對無壞。
陸羽仁
上一頁 下一頁
金融High Tea 舊文