金融High Tea 2013年8月5日
金融High Tea——揸一世的股份？
2013年8月5日
業績期到，各公司跟住業績炒，和黃(013)公佈中期業績理想，上周五升4.5%，升到91.65元。今日輪到匯控(005)公佈業績，預料都唔會差。
朋友問起點解睇好匯控，我話佢係環球銀行股，你睇美國的大銀行公佈出來的業績都得，匯控都差唔多。環球大銀行唔係生意好好，但係就大力節流，佢哋個底厚，要節流都有好多地方可以落刀，加上市場上錢多壞帳唔多，業績就持續改善。呢個世界，節流易過開源。呢啲以節流為主的企業行為，當然不可以持續令公司業績改善，呢種手法搞兩三年都得，無辦法長搞落去，若然幸運節流節到咁上下，環球經濟恢復，聯儲局加番息，息差放番大，收入真係多番，環球銀行業務才可以持續成功。
朋友聽我咁講完，再問咁匯控股價係唔係唔得？我話你千祈唔好有這樣的結論，唔係短期好易錯，我話匯控有遠慮，唔係近憂，我只係講三五年，唔係講三五個月的事，你睇中短期，佢無問題喎。
朋友聽到呢個講法，相當感歎，話佢自己係匯控擁躉，過去逢低就買，由50幾買到130元都買過，買多賣少，想唔到佢呢隻愛股已不再係可以盲目買揸一世的好股。
我叫佢唔好太天真，世界變了，全球化令經濟活動急促變化，網絡革命令人的溝通方式劇烈轉變，再加上金融精英極具創意的金融工程，令經濟周期更頻繁出現，甚至一間公司盛衰周期更頻繁出現，買股票的風險大增，沒有甚麼可以盲揸一世的股份。
投行大佬 一樣睇錯
大約十年前我同一個投資銀行界大佬級人馬搭同一班飛機，無所事事時請教他，香港有無一隻股票可以闔埋眼唔使睇，長揸一世？佢答話「只有一隻匯豐」，佢話匯控管理穩健，可以放心揸。那時大約有1000間上市公司，呢個投行大佬可以答我「唯有匯豐」，可見佢對呢間公司的信心。我之所以問佢，因為佢份工係幫公司上市，見盡唔同公司盤數，自然睇到乜係好公司，乜係壞公司，知道不少內幕，講話有一定份量。
事後看來，呢個投行大佬的分析當然係錯，信咗佢130元買匯豐家仲未見家鄉，而匯控出事也不只是因為2008年大市跌，佢自己都有好大問題，佢主要衰併購歐洲和美國的業務，特別是當買入美國米特蘭銀行包埋好多劣質資產和業務，才構成後來之禍，跌到30幾元，要低價供股集資。呢個故事教訓我哋，內行人都會睇錯，原因係呢種百年不遇的金融海嘯，配上如今多變的環境，好多事情唔係咁易估到。
呢個提問事件仲有一個有趣細節，我請教投行大佬投資意見時，咁啱同機仲有當時匯豐炒房阿頭歐智華，投行大佬唔知係唔係同行相輕，唔係幾睇得起歐智華，估唔到十年之後，歐智華貴為匯控行政總裁，設計匯控的翻身大計，但關鍵卻不是他炒作的本行，而是節流減肥。
無論如何，現今世代已沒有可以盲揸一世的好股，揸住隻股即使目前表現好好，要留意公司業績有無變化，若然變差，就要分析公司有無出現結構性問題，若有問題不能不減持。
美科網股 起晒大泡
舉一個例子，強如蘋果電腦，去年iPhone熱潮一時無兩，去年9月時股價炒上705.1美元的高位，及後股價走樣，如今得番462.54美元，股價比高位唔見咗34%。智能電話第一浸浪潮已過，那個時代人人以手持一機為潮，不計成本追逐iPhone。如今不只三星機打散iPhone熱潮，連三星機自己都好難保持高增長。有一個內地企業高層話，最近一次朋友聚會，連最後一個用iPhone的朋友也轉用三星機，可見iPhone在內地高端人群的優勢在急促減縮中。喬布斯是蘋果的靈魂，教主一去，蘋果就快速地從高峰向下。蘋果家的市盈率只有11.5倍，本來唔貴，加上美國科網股正在熱炒，但蘋果從低位反彈亦有限，可見市場相當唔睇好。你諗吓佢去年9月先至創新高，一年唔夠已從天堂到地獄，買股票真係睇少一眼都唔得。
蘋果係另類唔係典型，反映科技股走勢的美國納斯特克指數最近升上12年高位，好多科技股都衝頂，如網上銷售龍頭亞馬遜(Amazon)最近也創了313.62美元的新高，Amazon的市盈率達133倍，雖然Amazon好正，但係貴到咁，你話科網股無泡沫，真係無人信。
講到科網狂潮再起，自然要講吓在港上市的科技股王騰訊(700)，佢早前創咗高位364元，現價在近高位的360.2元，市盈率41.5倍，科網股龍頭谷歌(Google)的股價906.7美元，市盈率亦只是26.2倍，騰訊市盈率高谷歌咁多，自然好似亞馬遜咁，好有炒味。
股王騰訊 炒味十足
騰訊炒到咁香，自有原因，證券商亦大力唱好，當中以大摩的目標價508元最牛。摩根士丹利在研究報告中指出，騰訊於內地遊戲市場是龍頭老大，去年遊戲收入就是排在其後的5家對手總和，其遊戲產品受用家擁戴，另外亦可循微信開拓手機遊戲收入，因而把騰訊今後三年每股盈利預測，分別調升2%至10%，目標價由317.4元升至390元。
大摩又話，若騰訊的網遊收入勝過預期，而手機的遊戲利潤率比預想更高的話，樂觀估計騰訊未來估值可達預測市盈率34倍，股價可達507.8元。大摩同意現時騰訊市盈率對比中外網股皆偏高(現價歷史市盈率41.5倍，2013年預測市盈率約30倍)，但市場未計算其由微信帶入的移動遊戲收入，若連同此部份收入去考慮，騰訊高估值則趨向合理。
騰訊上市9年，股價暴漲97倍，唔係咁多人估得到，即使佢自己的管理層都估唔到，唔係就唔會由60幾元開始賣股。呢個故事教訓我地，唔好信內幕消息，好多時候，公司高層以為自己間公司仲係好好，但大鑊已在前頭佢都唔知。但有些時候其實公司可以好成功，但高層亦估唔到。
你睇大摩估騰訊有可能見508元的原因，唔係無理據，只要公司的主要收入來源都比預想中高好多，股價自然可以飛天。若最後騰訊股價真係飛天，主要有兩個可能：第一係騰訊真係可以做到大摩估計的業績，股價會體現出來。第二是市場相信了這些樂觀估計，加上環球都在熱炒科網股，就業績未體現都炒咗上去。
做分析員唔易，最緊要係開口中，你出個報告睇好一隻股份，公司同時推介自己的客去買，若然出報告隻股唔升，你已經衰咗。所以搵隻熱門股，順住個市出報告，會比較易成功(推高股價交功課)。
微信收費 下浪焦點
我唔係話騰訊唔掂，佢正在熱炒中，短期更似會掂。如果我係分析員，更會出個報告，叫「微信快將收費，騰訊收入爆升」，因為我真係聽到內地盛傳騰訊其實都好想微信收費，而且內地人對微信依賴愈來愈深，微信一係唔收費，若收費可能唔係好似另一手機通訊應用程式WhatsApp咁，只收8元下載費，而係按月收費，所以一係唔收，一收金額好可觀。微信收費可以成為騰訊下一波炒作的藉口。
當然，你聽我口氣，知道我對科網股的炒作潮有保留，現時的炒作和環球央行大放水炒起股市有關。騰訊雖好，但若無科網熱潮炒作，騰訊亦唔會咁高，當然加上阿里巴巴快將上市，呢個炒作潮就更火上加油啦。至於騰訊長期得唔得，要看他的生意能否持續成功，在變動不經的科網世界，要達成此目標難度不低。所以我會陷入一個分裂人格中，「投資的我」不會視這些股份為可以揸一世的好股，要吸取蘋果的教訓，股價愈高的好股，長揸風險愈大。但「投機的我」十分明白在泡沫市中，升市莫估頂，若有人炒，騰訊順住再炒絕對有可能，至於目標價就唔好咁信，反正順住炒、睇住路就得啦。
陸羽仁
上一頁 下一頁
金融High Tea 舊文