金融High Tea 2013年9月26日
金融High Tea——懶理阿里
2013年9月26日
美股連跌四日，內地則因為近季尾加黃金周，資金面臨緊張，令銀行間資金成本高企，市場憂慮局面持續將蔓延至實體經濟，出現系統性風險，先升後回。受外圍股市下跌影響，恒指昨日高開低走，臨收市後抽，才幸保不失。
不過，內地經濟回暖，旅客外游消費力大增，加上十一黃金周臨近，有分析指內地打擊貪腐的行動高峰已過，大款消費能力又開始「復活」，認為珠寶鐘錶等奢侈品會有番銷路，預計相關股份有能力反彈，周大福(1929)靠穩，微升0.7%至11.24元。俊文寶石(8357)表現最好升2.8%。
十．一最旺濠賭股
對於十一黃金周效應，無可否認今時可能唔同往日，會比以前略為失色，尤其內地近期推出《旅遊法》，禁止辦零團費旅行團。市場估計《旅遊法》針對的強逼購物問題，對香港消費的衝擊較大。相對而言，對澳門賭業影響唔會太大。博彩股表現相對好得多，其中澳博控股(880)、新濠國際發展(200)齊升超過2%，英皇娛樂酒店(296)勁升7.7%至3.48元。
由於大市炒個別板塊，恒指收市報23209點，升30點；國企指數微跌不足1點，造10598點。大市交投只有524億元。聯儲局何時收水繼續影響大市。市場預計到下次議息會議才可能見真章。恒指在23000點水平暫時會有一定支持。
兩隻首日掛牌的新股一升一跌，以「日本城」品牌在本港經營家品店的國際家居(1373)收報2.98元，較招股價2.81元高6%；污水處理公司中滔環保(1363)報1.33元，較招股價1.48元低10%。
講起新股，爭議多時的阿里巴巴上市方案，初步傳出港交所(388)與公司商討失敗，公司可能會去美國上市，中環茶友聽完消息，就話祝阿里班股東好運嘞！
今次阿里巴巴選擇掛牌地點扭來扭去，皆因去美國上市就驚掛咗牌之後被人做世界，尤其淘寶網有不少供應商存在知識產權爭議，去到打官司唔使本的美國，隨時被人告到失魂。本來呢個風險唔使講阿里管理層都知，關鍵係公司創辦人馬雲為首的一班股東，並無足夠股權控制公司，擔心掛牌後失去管理大權，於是要求港交所可以學美國一樣，提供同股不同權的特別安排，可惜呢樣嘢傾咗咁耐，最後聽講係證監反對下拉倒。
阿里唔嚟股民不可惜
阿里主要股東為了控制權擱置在港上市，是否真係去美國仲要觀察吓先有定論。茶友話，阿里唔嚟香港掛牌，當然係港交所損失，至於係咪香港股民損失，就見仁見智嘞，因為多年前阿里把電子商貿來港上市，掛牌高開低收，最後公司私有化，小股東全無着數，經此一役，公司成日被人唱話佢唔益人。
呢次阿里來港上市雷聲大大，好多科網股摩拳擦掌想炒一餐，不過最緊張都係港交所，因為佢唔嚟上市，等如港交所少咗個大客，但對投資者嚟講，大家都唔肯定有無着數，故此市場反應不痛不癢，故此公司就算點扭，都聽唔到有太多支持放寬規定的聲音。茶友話，阿里巴巴上次私有化可能食得太盡，佢嚟唔嚟香港股民無感覺，削弱咗今次講數條件，呢啲唔知叫唔叫做人算不如天算嘞。
雖然阿里來港打定輸數，但科網股依然有景，巨股如騰訊(700)同中移動(941)，繼續跑贏大市，睇嚟就算少咗隻巨型新股來港，呢陣熱潮都仲會繼續玩多陣。
陸羽仁
上一頁 下一頁
金融High Tea 舊文