陸羽仁 BLOG 2013年11月19日
唔賭就窮硬
2013/11/19 上午 09:40:18
網誌分類: 經濟
自從美國總統奧巴馬宣布任命耶倫為聯儲局主席伯南克的接班人後，美股一路升到昨天，已經連升6個星期，至昨日，杜指一度升穿16000點，今年有已係第39次創收市歷史新高，真係升到你唔信。
昨日早段，美股承接全球股市升勢，繼續向上。除了市場繼續預期聯儲局泵水唔會手軟外，中國表示將允許私人投資進入國有行業、擴大農民土地權限，推出中國自1990年代以來最大的經濟改革措施，亦係其中主要原因。投資組合經理凱瑞(John Carey)表示，「中國的改革措施，可能會推動未來幾年的經濟增長，投資者自然會積極入市。」
不過，正如一些分析員指出，當大市高於歷史高位，投資者的神經亦變得特別敏感，有乜風吹動，都會跳跳紥，做成特別波動，短炒走短線者隨時走唔切而中招。正當杜指突破16000點大關，標普500指數亦超越1800點之際，一向被視為「鴿派」的紐約聯儲銀行主席達德利(William Dudley) 只係話對美國經濟發展更具希望(more hopeful)，市場馬上解讀為達德利對貨幣政策態度開始轉軚，杜指就掉頭回落，回軟20點。事實上，即使「鴿派」從來都認為聯儲局最終都會減少買債規模，只係何時才是適當時間而已。
及後，美國股壇大亨Carl Icahn話佢對股市「非常謹慎」(very cautious)，可能會有出現「大跌」(big drop)，原因係好多美企的盈利來自低成本借貸，而唔係有良好的管理。杜指又即時回落70點，由升轉跌。Netflix， LinkedIn ，Facebook及 Zillow 等大型股票反應就大好多，LinkedIn 及 Zillow跌近4%，Facebook勁插超過6%。杜指臨收市後抽，收報15976點，仍有14點進賬，再創收市歷史新高。
唔單止股市因Carl Icahn的言論下插， 黃金及原油價亦受到牽連，油價急跌2美元至每桶92.8美元，金價亦於幾分鐘內跌6美元至每安士1274美元。惟一沒有變動的係聯儲局最關著緊的美國10年期國債息，維持在2.672厘水平。
順帶講幾句網友october的意見，佢話:「賭就輸硬，唔賭就窮硬，小散走頭無路, 點都死路一條…….我覺得買少d輸少d. 呢兩年我都輸少左, 原因係少買. (大把千年蟹估唔計).」
「賭就輸硬，唔賭就窮硬」，的確係散戶悲歌。唔賭就窮硬，皆因今時今日香港的社會，向上流動機會減少，勤勤力力打工好難發達。但你去賭股票，又真係好易輸，皆因股市有太多裝老散的陷阱，你覺得呢隻股升極未完，你行入去，已是爆煙花的末段。
買少的輸少的，的確係一個好開始，唔好濫買，如果你過去日日炒輸多贏少，減少進出就可以減少虧損。但亦唔等如唔可以買股，要小心研究，睇準啲大市和個股的走勢，睇準大市和個股的基本因素，首先判斷係向上還是橫行，在跌得多時分析公司生意係唔係咁差，有一個基礎判斷，唔好盲中中入市，就會增加取勝機會。
陸羽仁
回應(5) 我想回應
陸羽仁 BLOG 舊文