金融High Tea 2013年11月19日
鬼佬口味
2013年11月19日
港股上上落落一輪，終於出現爆炸式走勢，借住三中全會的「好消息」，恒指單日爆升六百幾點，最緊要係成交暴增至過千億元，價量齊升，原先的「三中敏感症」不藥而瘉。
港股開市已經係買盤湧入下推高，經紀張打電話嚟問，究竟搞邊科，大家唔係話三中不利國企咩，點解突然咁多買盤，唔通學你講，內地深化改革，加強市場機制，真係啱晒鬼佬口味？佢仲猛咁叫陸羽仁畀位佢，睇吓個市可以去到幾多點。
炒國策要細分
陸羽仁答佢，畀位就無謂啦，本來，三中全會得一個，無理由上個星期睇到咁淡，今個星期又睇到咁好。內地話要開放市場，利率應會自由化，對內銀係會有影響，無理由突然間壞消息變好消息啫，按照呢個道理，個市衰時唔需要太悲觀，好時都唔應該太樂觀，家(昨日早上)個市升咗近千點，你話升多幾百點又得，升多一千點都得。後來見個市成交咁增加，短期都無謂估頂，總之要細分不同國策好淡，睇吓你買咗乜股仲實際，如果你買咗政策敏感又利淡的股份，最好仲係趁高逐步減啲磅，若然買的是新能源、環保股，就可以坐多陣囉。
升之餘成交增加，上星期已有大戶手影可捉，因為有留意財資市場的中環茶友話，港元匯價上周中起開始轉強，不排除係有錢流入，啲錢去咗邊當時唔知，而家睇或者係準備買貨都唔奇。
今次個市炒三中全會文件公佈多項利好消息，恒指貼近全日高位收市，收報23660，升627點，國企指數仲勁，收報11307，升604點，成交金額由上周五的669億元暴增至1121億元。
講起國策受惠股，三中全會決定推進事業單位養老保險制度改革，令今年疲弱的一眾內地保險股走勢凌厲。國壽(2628) 抽升1.85元，報23.1元；平保(2318) 大升6元，報69.5元，兩股成為藍籌升幅最勁首兩隻成份股。保險股係內地股市不振下，股價家唔係咁貴，如果內地個市好轉，保險股再有啲水位都唔奇。
急於高追要睇車
同樣炒內地股市好的，還有內地證券股。趁住中央推進股票發行註冊制改革，中信證券(6030) 搶高13%；海通證券(6837) 抽升近11%。內地證券股多數短癮，股民高追要睇車。
個股方面，恒大地產(3333) 唔止賣樓巴閉，2012年合約銷售樓面面積按年增長近27%至1549萬平方米，全國第一。集國轄下的足球隊廣州恒大，上個星期仲攞埋亞冠盃冠軍，威到爆。原來恒大集團唔單止賣房、賣足球門票，最近仲準備賣埋礦泉水。中國的飲料行業每年以30%至50%的速度在增長，比較出名的農夫山泉每年賣水的收入在40億元至50億元。水行業的利潤率不錯，假如做得掂，回報率相當豐厚，難怪恒大老闆許家印想進軍這個行業。
據聞恒大集團在長白山拿到一處儲量豐富的好水源，先天上有了水源地的優勢，加上恒大趁亞冠盃奪冠之夜猛烈造勢，令「恒大冰泉」一炮而紅。業內人士指出，一隻新牌子飲料，單係建立全國管道，至少都需要3至5年。內地涼茶龍頭「加多寶」，涼茶做得咁厲害，屬下的「昆侖山礦泉水」都要連續虧損三四年，情況才慢慢好起來。恒大冰泉，出場聲勢浩大，已經攞了頭威，有冇尾陣，仍要需拭目以待。
陸羽仁
金融High Tea 舊文