金融High Tea 2013年11月26日
官媒鬥土豪
2013年11月26日
美股創新高，港股經上周急升後，走勢變得反覆，恒指高開後只係上上落落，並無大力爆上，資金跟住唔同消息炒作吓。
央視《每周質量報告》報道，調查發現45間上市房企欠繳土地增值稅。搞到內房股一陣騷動，不過成個板塊無明顯壓力，反映大家都覺得央視發炮，好難郁到土豪的根本利益。
欠債報道似屬口水戰
據報道講，在2005年至2012年間，房地產開發企業應交而未交的土地增值稅總額超過3.8萬億元人仔。被指欠稅最多的是雅居樂地產(3383) ，欠繳稅達83億元；富力地產(2777) 佔58億元。由此推斷太小房企，合共欠交3.8萬億人民幣天文數字的稅款。
對央視的報道，「土豪」們紛紛嗤之以鼻，指土地增值稅是按項目所在地政府規定的比例，在預售時先預繳，在未達到稅法規定的結算條件時，可以不交，不違背稅法，也非拖欠。華遠地產董事長任志強更即晚在微博發文，直斥央視報道「愚蠢和無知」，大謬不然，相當唔畀面。
呢單嘢究竟應該點睇呢？我覺得官方喉舌咁樣發炮，只能講反映咗中央對內房商的不滿，但相關稅款好多時涉及地方政府和內房商，條數唔係好似表面咁講得咁清楚，當然亦唔係央視計幾多就幾多，所以報道一出來，內房高管即企出來反駁，根本一啲都無腳軟。
欠稅天文數字的說法，暫時睇落只係口水戰居多，一眾土豪似乎未驚過，內房股昨日個別發展，雅居樂表現最差，跌超過3%，富力跌超過2%，另外欠稅榜上有名的合生創展(754) 及融創中國(1918) 跌逾1%。
恒生指數喺缺乏利好消息下，收市輕微倒跌11點，收報23684點，國企指數跌61點，收11387點，成交576億。
講開官媒鬥土豪，早前恒盛(845) 停牌，由大股東提出私有化。恒盛幾年前上市，以每股4.4元招股上市，掛牌後迅即潛水，潛得最深時，曾經得番招股價兩、三成。
由於掛牌後公司缺乏發展，無論投地抑或賣樓，都比大部份同業遜色，加上大股東係美國炒股出事，被監管當局追究，公司無論業務抑或股價，短期都好難有起色，私有化應該係自我了斷的方法。
恒盛私有唔易搞
不過，公司停牌後公佈的私有化價格，只有每股1.8元，同當年招股價差一大截，何況期間內地樓市仲升咗咁多，如果上巿時坐咗艇的小股東，肯定心有不甘，覺得大股東高沽低買，用財技撈一筆，呢批人捱得咁耐，肯唔肯就咁認輸就範不無疑問。從公司復牌股價與建議私有化價格有明顯折讓，可以見到市場覺得計劃存有暗湧。由於大股東第一次出手太低，除非大幅加價又或者搵到持有好多股份的小股東支持，否則私有化隨時得個搞字。
正股無乜睇到，新股市場今個星期就進入大混戰。本周將再有8隻新股展開招股程式，連同3隻正在招股的新股，吸資總額超過430億元。本周起公開招股的8隻新股，分別為四大國有資產管理公司之一的信達資產管理(1359) 、內地主要煤炭港口營運商秦皇島港務(3369) 、意大利化工廠M&G、管樁製造商建華管樁、廣東房地產商時代地產、香煙包裝紙生產商華禧、春泉產業信託(1426) ，以及內地綜合零售商益華百貨(2213) 等。熱鬧程度，可以講係今年之最。
陸羽仁
金融High Tea 舊文