陸羽仁 BLOG 2014年3月17日
馬雲唔會輸
2014/3/17 上午 09:43:40
網誌分類: 經濟
大市仍由壞消息主導，烏克蘭克里米亞地區加入俄羅斯公投上星期五拖住美國個市，杜指跌45點收場，去番16000點邊上，收16065點。
克里米亞公投點咗一半票，95%支持加入俄羅斯聯邦，公投結果成定局。關鍵是俄羅斯下一步點玩，佢可以由國家杜馬(國會)決定讓克里米亞加入(annex)俄羅斯聯邦，但俄國總統普京在3月4日曾講過無意讓克里米亞加入，所以俄國也有較溫和手法，例如維持克里米亞「自主」地位，俄國在當地長期駐軍。若俄國一宣稱讓克里米亞「加入」，市場會即沽。
香港可能較關心網股風雲，上星期五先來一劑人行叫停虛擬信用卡，周末再有馬雲棄港從美，香港唔俾馬雲的阿里巴巴以合夥人制度在香港上市，阿里巴巴宣布傳向尋求美國上市，之前馬雲入股咗中信21(241)和文化中國傳播(1060)，有股民以為阿里巴巴會利用佢地借殼在香港上市，馬雲點玩呢兩隻嘢唔知，至少「借殼」呢部份無得炒。
阿里巴巴呢次吹咗一輪結果又唔嚟香港上市，皆因佢想用合夥人制度上市，即係控制公司10%股份的合夥人，可以指派董事局的大多數，而做阿里巴巴合夥人先要在公司工作5年或以上，這是一個以小控大的安排，港交所雖然好想阿里巴巴來香港上市，但都食唔落呢個制度。
相信大家仍有印象，阿里巴巴曾經將一部份生意攞過來香港上市，一上市就由招股價13.5元，炒上40元，之後派番落嚟，長期在約15元上下橫行，被股民指為「四十大盜」。馬雲最後用招股價的13.5元私有化阿里巴巴，令到好多散戶連報仇的機會都無埋。所以香港食唔起阿里巴巴，散戶係得係失都講唔定。
要炒馬雲概念，中信21(241)和文化中國傳播(1060)仲有得俾你炒，但好多股民高追咗文化中國，都唔知佢做乜，文化中國上周三復牌，開市就已經係2.5元，朝早更一度炒上3.39元，勁抽4.3倍。不過一閃即退，股價好快就隊番落嚟，收市1.84元，漲幅收窄至1.86倍，老散當日掂親都「瀨」，有人摸頂買完先至嚟問我佢做乜。我話你可能接咗貴貨喎，事關騰訊本來持有8%文化中國，如今阿里巴巴斥資62億元掃入60%股權，橫刀奪愛，盛傳騰訊在文化中國復牌日已沽貨走人，馬化騰食咗糊，散戶上咗車先至問架車總站開去邊，好有盲俠feel。
睇好多老散的反應，其實係見到馬雲買乜就炒乜，文化中國狂炒，馬雲此前買嘅中信21(241)，卻係咁跌，由上周二的7.3元，跌至上周五的5.5元，三日唔咗34%！我估老散的心態係以為阿里借殼上市，其實錯曬，馬雲即使唔係炒股，係正經做嘢，都只係想借助買這家公司的業務進軍文化產業而已，一講到要慢慢做生意，自然唔應該馬上升到暈。
文化中國究竟係乜東東？原來佢旗下業務好多，主要做文化事業，佢擁有《京華時報》和甘蕭衛視的大部份股權。甘肅衛視同亦參與影視製作，星爺執導嘅《西遊•降魔篇》，就係文化中國製作嘅。文化中國另外一瓣業務係從事手機遊戲，估計係馬雲要染指的重點。阿里巴巴長於電子商貿，騰訊長於網上社交和手遊，阿里巴巴可藉文化中國進軍手遊，進攻騰訊的核心業務。睇馬雲近期收購了蝦米音樂，又從騰訊挖來此前負責數位娛樂及多媒體業務的集團副總裁劉春甯去負責該板塊業務，又在今年1月正式推出手遊平台，看來頗有心去搞這方面的業務。
固然，若阿里巴巴大力擴展文化中國的手遊業務，可以讓股票增值，隻股仲可能有得炒吓。不過，大家要留意，文化中國加埋發新股效應，上周最高炒到3.39元，等如市值705億，到上周五回番落1.72元，加埋發新股市值仍有358億，文化中國去年稅前盈利才只有1.9億元，以此舊盈利計市盈率188倍，你要預計文化中國可以做到幾十億盈利，才有長線投資價值，如果你係買嚟短炒，當然係另計啦。
不過有內地評論話「馬雲唔會輸」，下一句係點可以加上去。佢0.5元入股文化中國，做生意又好，炒股又好，又點會輸錢呢?
陸羽仁
回應(3) 我想回應
陸羽仁 BLOG 舊文