金融High Tea 2014年4月14日
美國轉態 紅色股有運行
2014年04月14日
港股近日轉強，恒指上周四突破兩萬三點，翌日受美股拖累回軟，但仍能險守兩萬三，跌幅亦較美股細。上周五杜指再跌143點，恐怕港股都要跟住回，不過近期港股都幾硬淨，相信唔至於大插特插。
造成港股近期較強勢的原因有兩個，一個已經街知巷聞，大家唔會唔知。另一個原因，大家未必知道。大家都知嘅部份，係阿爺批准開展滬港股票市場交易「互聯互通」實行試點，預計6個月後正式啟動。在試點初期，將設置額度，A股每日130億元人仔，總額度3000億元；港股每日額度為105億元人仔，總額度2500億元人民幣。香港有藍籌股、H股同恒生中型股指數成份股共266隻港股參與，A股則有560多隻上交所成份股參與。
試點成功 擴大推行
有讀者問我，香港的額度得2500億人仔咁少，若日日成交滿咗105億元人仔個額，24個交易日玩完，無乜用喎。我覺得大家唔好畀投資額度呢個表像所迷惑，認為金額唔係好大，港股每日成交都有700、800億港幣啦，一日多105億人仔，對大市的實際影響唔大，這只是一個開始。
今次嘅互聯互通，就係2007年流產了的港股直通車的雙向版，當時講放部份內地人買港股，家除了內地人買港股，香港人亦可以買內地股。當時建議的港股直通車，係中央對天津濱海新區的一項政策優惠，內地投資者要真人去當地的中國銀行分行開戶至可以炒港股。
今日互聯互通限制了參與港股通的境內投資者，只能係機構投資者及有唔少過50萬人仔資產的證券帳戶，但沒有地域限制，在內地，有50萬人仔股票的人，無1億都有幾千萬人，所以覆蓋的範圍比當年大好多，基本上係全國性。
AH差價 可望收窄
更重要嘅係，千萬唔好覺得數額有限，兩地加起來只有5500億人仔，咁就睇少佢。熟悉內地情況的高人講，部份香港人唔明內地做事方式，推出重大政策，都要先找試點，成功先至全面鋪開，中央一來唔想見到一開始就搞得太大失咗控，衝擊了香港或內地股市；二來更加唔願見到內地黑錢借此渠道流出國外。當然啦，如果試點做得流暢，唔出亂子，內地出口的資金流受控，互聯互通的總額度會不斷擴大，最終變成無限制，做到香港資金可以無限制買A股，內地資金可以無限制買港股。當然，互聯互通和人民幣國際化好有關係，內地A股以人民幣報價買賣，內地人買港股都要用人仔換錢做交易媒介，做得好加強人仔認受性，會加速人仔走向世界。有問點解上次2007年提出「港股直通車」，股市反應極大，只聞樓梯響，港股已經發晒癲，點解今次在感覺上無咁勁呢？原因係2007年中港股市都好熱，內地再話放水，火上加油，群情自然非常洶湧啦。今時今日，兩地投資者已輸到心都涼晒，你話開閘放水，都唔識反應啦。不過，我個人覺得，在這種冷冷哋嘅情況，才適宜搞直通車這類措施，因為毋須擔心突然有巨額資金湧進湧出股市，對股市造成太大衝擊，以現時的狀況，直通車對兩地股市有加溫作用，但唔至過熱。對內地股市而言，吸納的資金對象，其實係透過香港走入去的外國資金，由於資金源係無限的，所以唔存在A股市場會吸乾本地資金的憂慮。
阿爺容許內地投資者買海外股票，先通香港，只係起步而已，最終會開放至全世界市場。當然，香港嘅266隻股票，就飲到內地資金嘅頭啖湯。總括來說，唔好睇少互聯互通政策，其長遠影響會非常深遠。而香港賴以為生的老本金融業，可以繼續食落去。
至於有乜好股可以揀？即時諗到嘅係內地人熟悉、但喺A股市場買唔到的國企股，例如中移動(941) 。中移動本來好弱雞，但呢幾個星期由64.5元彈上上周五嘅74.6元，估計可能係春江水暖鴨先知啦，不過中移動本質較弱，利短炒不太利長揸。其次係兩地股價有大差別的股票，即係H股比A股落後比較多的股票。最後一類係同內地比較有關係的中小型股票，要知道內地資金都係炒作為主，唔好期望佢哋會買可以長揸嘅實力大藍籌。
烏國變天 劍指俄國
另一個可能係香港國企股和內地股市近期轉強的原因，大家可能無乜留意的：國際政治的大變局。近期，美資外資，忽然間無情情吹起唱好中國經濟之風，我起初也有些不明所以，跟一些外交官員吹完水，摸到些許脈絡，可以和大家分享分享。由2009年聯儲局大放水救市開市，歐美市場雖有波動，但整體向好，新興市場就衰啦，好似《創世記》第41章講嘅埃及「七個豐年之後，跟住係七個荒年」，美國放水令新興市場通脹急升，被迫收水，新興國家豐年的時候瘋使，一收水，經濟就急速衰退。過去幾年，港人炒股，上上落落，結局得個吉，中國股市向下，美國股市就係咁升。美國放水，其實係搵緊我哋笨。
不過，隨住烏克蘭變天，國際政府也生巨變。繼克里米亞成功脫離烏克蘭，加入俄國聯邦後，烏克蘭東部重鎮頓涅茨克幾日前又宣佈獨立，烏克蘭亂局難收，搞到美國佬非常頭痕，劍指搞局的俄羅斯。
美俄大鬥法的副作用，卻改變了美國要壓制中國的態勢。唔知道大家有否留意，上周國際貨幣基金會(IMF)上周二出報告，下調俄羅斯今明兩年的經濟增長預期至1.6%和2.5%，分別較前次預估下調了0.6個百分點和0.2個百分點；中國經濟都有下調，但相對幅度細好多，只係下調0.1個百分點，今年仍有7.1%增長，語調仍看好中國。
近期亦開始有好多歐美大行開始睇番好中國經濟，例如德意志銀行就發表報告，指「投資者似乎誤解了中國債市與其他國家的重要差異，因此對於違約的可能性過慮。」關鍵差別在於，「違約的可能性低。」
托住油價 夾死中國
你的即時反應可能係，乜外資唔係話中國地方債好嚴重，隨時會爆煲咩？家又轉口話「違約的可能性低」，豈不是隨口噏差唔多？外資睇中國，經常係咁，舉個例建行(939) ，PE 4.9倍，息率7厘，你可以話，建行跌得咁低梗有原因，內銀隨時倒閉，所以唔好買！又可以話PE咁低，物超所值，應該入貨。
對於外資忽然轉軚，唱好中國，我有一個「陰謀論」：美國過去一直在經濟壓抑中國，但未來將會變為唱好中國，借此吸走俄羅斯資金，拖垮俄國經濟。唔好畀我講中，美國下一步會係推冧油價。呢兩年美元從低位反彈，新興市場對商品需求大減，商品價格大插，好似銅價跌到阿媽都唔認得，但油價跌幅卻有限，從高位147美元回落嚟，到100美元上下就唔再落。你睇美國對原油需求亦在下跌中，美國頁岩油大量開採，美國到明年已經變成石油淨出口國(除入口加拿大石油外)。美國由全球最大用油國，走向淨出口國，油價所受嘅壓力有幾大可想而知，但油價卻高踞不下。我估主要係美國從中作梗，頂住油價。點解？目的係阻慢無石油唔掂嘅中國經濟發展囉。不過，這個用石油打擊中國的戰略，卻益咗俄國，俄國經濟偏重能源，有估計油價在75美元以上時佢好掂，低過75美元佢有問題。
美國顧住打熊貓，就畀隻北極熊坐大啦。美國過去托住國際油價用嚟打中國，將來會推低油用嚟打俄羅斯啦。無巧不成話，美國昨日突然釋放500萬桶戰略石油儲備，提出嘅理由係試驗市場中斷時對原油儲備的反應。能源大跌價，中國經濟更好。
若然我的陰謀論係啱，除了變相直通車有利香港之外，美國也會唱好中國，改變外資過去極度看淡的態度。大家對紅色股可以逢低吸納，由於美股可能未跌完，亦會拖埋港股落水，手上有股票的，亦不妨揸實啲，唔好手震震，俾人震晒出街。
陸羽仁
金融High Tea 舊文