中環在線：出報告撐巴西奪冠同馬會賠率一致高盛世盃貼士嘥氣？ - 李華華
決賽巴西VS阿根廷高盛貼士60頁解釋
四年一度嘅世界盃下月開波，財經界好多人已經做好準備，早兩日efinancial Career做嘅調查已經話有74%香港金融人士決定睇波，美資投行高盛噚日亦發表報告講世界盃，預測決賽係由巴西對阿根廷，巴西捧盃；走去睇馬會賠率，巴西正是大熱，賠率３倍。其實睇波係咪唔使分析咁多呢？
高盛用咗67頁嘅報告去講今屆世界盃，主要利用每隊球隊往績作為數據分析，仲搵埋德國名宿碧根鮑華同埋幾位現役車路士球員做訪問，非常認真，當然球迷會比較想睇燈神球王比利貼賽果多啲！
報告話決賽組合會係巴西對阿根廷，巴西會以3比1贏得世界盃。華華搵番上屆高盛份報告，都係貼巴西。2010年世界盃冠軍係西班牙，巴西八強出局。
上屆摩通貼冠軍係英格蘭，引嚟唔少本地球迷嘅歡呼聲，話曬香港最多英格蘭fans，不過，高盛就冇咁客氣，話「喺傳統強隊之中，英格蘭係唯一一隊踢世界盃冇明顯好表現嘅球隊」，完全冇理過本港英迷感受。
■高盛講今屆世界盃嘅報告，一共有67頁。
分析國情擦習總鞋
不過，高盛明顯好熟「中國國情」，雖然中國冇份踢世界盃，但都特登寫兩頁專題講「中國印度幾時踢世界盃決賽？」，輕力擦一擦鞋。
佢話之前嘅領導人鄧小平係球迷，𠵱家又有另一個球迷領導習總，換屆時投資咗好多喺足球度，反貪可以改善中國足球隊嘅表現，但係踢決賽都仲要好多代之後先有可能。
黃國英買瑞士博對沖
講到世界盃，唔少股評人都係粉絲，黃國英(Alex)噚日仲喺社交網站自爆落注5,000元買瑞士捧盃，博贏100倍，即係50萬元，不過就被網民笑佢送錢畀馬會使！
Alex就好霸氣咁回應「買冷門，一個理由就得啦」，佢原來唔係博瑞士贏，係博佢入八強，然後就使出芬佬招數：瘋狂對沖。當瑞士入八強，佢就會以回本做目標，落注對家晉級，直到決賽，每場比賽結果有兩個：一係瑞士晉級，佢仲有機會博50萬元；一係對家晉級，佢唔使輸錢。
呢個策略最重要係瑞士唔好咁早出局，對家球隊又唔好太熱門，所以Alex希望巴西、德國、西班牙等強隊死快啲喎。
■黃國英買冷門瑞士(圖左)，博佢入八強，然後就瘋狂對沖。
沈大師捧巴西
「沈大師」沈振盈就鍾意喺分組賽埋手，搵啲冷門有賠率嘅球隊下注，因為去到淘汰賽，球隊有幾多斤両，大家一清二楚，冇曬值博率。至於心水球隊，佢同高盛睇法一致，估巴西捧盃。
李華華
mailto:LiWaWa@AppleDaily.com
【壹錘定音.李慧玲】6月4日早上8點正式開咪！
即like【壹錘定音】facebook專頁！
https://www.facebook.com/hammerout.hk
上一則: 樂香園：減自由行是「狼來了」？ - 海迪
下一則: 中環在線：港航搞上市三個保薦人走剩一個 - 李華華
中環在線 - 李華華 舊文