金融High Tea 2014年5月29日
爆冷執平地
2014年05月29日
乘着美股造好，港股昨日開市就夾高，成交都多咗，期指就快結算，由於香港係自動結算，大戶要脅淡友，基本上頂住指數就OK嘞。
5月份個市雖然唔錯，指數一反五窮傳統有進帳，但要賺錢都唔易，主要係因原先散戶愛炒的兩大股份濠賭同科網股唔係咁靚仔，其他傳統股份，好似國企同地產股咁，雖然反彈唔少，但敢喺低位撈貨者只屬少數，可見大戶撩高指數都係好策略性，唔會全面推高指數放走散戶。從呢個角度睇，個市唔似有大好的條件，過完5月最好再觀望吓大戶點部署先。
散戶至愛股份濠賭同科網股，跌後都有反彈，雖然佢哋都屬於高位大幅回落的鑊氣股，陸羽仁對佢哋的睇法有小小唔同。科網股點走，未來要睇美國科網企業表現，如果美國科網股仲有得炒，香港一樣會跟炒，美國股民依家注視稍後阿里巴巴上市的大龍鳳係咪做得成，如果阿里反應好，本地科網股又再炒吓都唔奇。
美資換馬大金沙
反而濠賭股陸羽仁就審慎啲，因為中央依家講緊廉政，又講緊反奢侈，樣樣都衝着博彩業而嚟。美國基金Waddell & Reed剛減持金沙中國(1928) ，轉而增持其母公司金沙集團，減持股份每股作價55.45元，涉及1.93億股，股份昨早上板，金沙中國守穩配股價，收報57.05元，跌2%，搞到其他濠賭股也普遍走軟。美資基金減持澳門股份，增持母公司，其中一個解釋係想減低在中國博彩業的曝光率，將籃雞蛋擺得分散啲。
金沙在美國和新加坡都有博彩業，但講到市場，照計中國始終係人口最多，而且華人係西方人士眼中係喜歡博彩的民族，按正路應該要放重注碼係中國，Waddell & Reed今次咁樣調整組合，你可以話佢睇好美國復甦，亦都可以話佢睇淡澳門短期增長。美資基金一向喜歡捧自己友場，佢哋有人抱住這種睇法，對美國濠賭股的影響可能又會明顯啲。
濠賭股普遍偏軟，領軍科網股的騰訊(700，臨時編號2988)將於今日開始每手拆細至100股，昨日全日揚1.7%，藍籌股普遍升，國壽(2628) 計劃變身為金融服務集團，昨日收報20.95元，升2.95%，為表現最佳藍籌。恒生指數昨收報23080點，升135點；國企指數收報10198點，升115點，大市成交大幅增加至719億元。
低價批地 新界樓勢增
收市後，政府宣佈兩幅地皮招標結果，啟德地皮由會德豐(020) 以25.2億元投得，較市場估值約22.72億至24.78億元為高，會德豐系內曾投過九龍灣商業地，未起好已賣咗成幢樓花，今次出高價再投東九龍地，可以話係食髓知味。過去一年會德豐連番出擊，買入將軍澳多幅地皮，依家仲未停手入貨，可以話做咗新一代大好友。
至於鷹君(041) 用24.12億元買入的白石角地，本來市場估先前同區有地流標，今次有可能重演，結果中標價遠低於市場估值29.24億至46億元，堪稱係破底價。
鷹君無買地起樓好耐，今次爆冷執咗幅平地，將來係咪賺到笑唔知，但一葉知秋，從政府肯破底價賣新界地，未來供應增加的新界樓，依家價錢未係跌咗咁多，風險睇嚟大過市區樓幾多喎！
陸羽仁
金融High Tea 舊文