魚樂無窮：尋找下一隻俊和發展
■閻峰任主席的國泰君安盈喜內容全部真材實料，三大業務範疇收入齊齊大升。資料圖片
老牌建築股俊和發展(711)表示，持股56%嘅控股股東GT Winners獲獨立第三方洽購股權，賣盤消息刺激俊和炒高71%，並以接近全日高位收市，意味大家對呢單刁信心十足。殼股搶手乃不爭事實，按圖索驥，不妨冷吼另一建築股盈信(015)，公司兩大股東持股逾七成，市值約10億銀，曬士唔算大，內房企業求殼心切，盈信絕對啱佢哋口味，噚日股價已見異動，不妨小注跟進。
國泰君安(1788)盈喜，噚日竟反高潮整支大陰燭，原因有兩個︰第一，累積升幅大。國泰君安已連升五日，共升12%，趁好消息出貨是常識吧。第二，高位蟹貨多。上次爆出滬港通消息，國泰君安高見5.49元後回落，不少散戶喺5蚊樓上被套牢。
國泰君安盈喜諗得過
睇番盈喜內容，全部真材實料，買賣及經紀業務、貸款及融資業務利息收入、企業融資業務收益三範疇齊齊大升，帶動中期盈利按年升1.5倍。保守估計下半年盈利持平，市盈率亦降至11倍，較過去三年平均嘅14倍，大幅折讓超過兩成，估值一流。基本面方面，公司早前以36億元入主上海證券，部署食滬港通大茶飯之心明顯不過，加上阿媽國泰君安證券乃內地行業龍頭，協同效應不容忽視，經過消化後，股價有力再振翅高飛。
今晚愛隊荷蘭出戰阿根廷，今屆荷蘭打入四強，除因洛賓踢出身價外，更重要係以往常見嘅球員內訌，今屆幾乎絕跡，所謂團結就是力量，一於捧荷蘭晉級(2.12倍)！
唐牛
https://www.facebook.com/tongcow88
唐牛
魚樂無窮 - 唐牛 舊文