中環迷你裙：酷派4G拉頭馬
■郭德英任主席的酷派在內地以4G機搶佔市場，工信部批准的4G手機中，酷派已佔50%。資料圖片
炒股入門條件：要唔鍾意睇波！世盃開波以來，踢極唔鬱的舊經濟股齊齊起動，撲中內房和資源股賺到笑，資金近日轉炒鐵路和手機股，前者印象麻麻，自從港鐵(066)買入國產嘢後，班次有幾準大家心照，總理越hardsell，Samantha越心驚，而大陸手機品牌已打進港人生活圈，近排多了朋友話「XX大陸機機身靚，睇片睇得順」，自由市場中，國產機已用實力證明自己的價值。
最近有調查指，酷派(2369)4G機在大陸稱王，蘋果和三星都要死開，其實年頭市場已感受到酷派爬頭的速度，去年躋身全球第七大品牌，增長率達128.8%，成十強中增長最快的企業，靠的不是做場盲搶機，搶極都搶唔到的大龍鳳，而是買手機送Tesla，甚至在小米樓下挑機吸引市場注目，再用源源不盡的貨源搶佔市場。點解冇小米？因為部4G機還在雷軍個肚入面，未趕得及出世。
酷派上月報喜料首五個月純利大增，股價短短兩星期已炒高逾25%，仲有得去？冇錯！因為酷派是4G市場的先頭部隊外，兼接近獨市生意，酷派聯同中國電信(728)的天翼，發佈賣千元雙卡的酷派雙棒T1搶飲頭啖湯。
在唔少國產機仍在新制式中水土不服之際，工信部批准的4G手機中，酷派已佔達50%，要食住4G熱破頂絕對有可能！
Samantha
本欄逢周三、五刊出
Samantha
中環迷你裙 - Samantha 舊文