金融High Tea 2014年7月21日
高沽低揸有得執
2014年07月21日
周末去咗書展為買咗新書的朋友簽名，見咗好多讀者網友，佢哋問咗唔少問題，可以將有關討論和大家分享。
最多人提到的問題是︰「揸住股票唔郁，上上落落得個桔。」我的答案就係唔好揸住股票郁都唔郁，升得高啲時沽吓，跌得多啲時買吓，增加回報。唔好覺得我講高沽低揸，即係話「阿媽係女人」，舉個例子可能易明啲。
我5月時話啲內房跌到咁上下，喺專欄講過可以買吓中國海外(688) 炒吓波幅，我公司有個靚女聽咗我講入市，在17.84元買咗中海外，我當時話過如果有15%可以食胡，佢在20.5元先沽一半，另一半本來想等21.5元，但沽完第一轉見佢回番落去，再上20.6元時走埋，扣埋手續費都有15%賺。
買中海外 食胡走人
靚女沽完見隻嘢再上，上周五收20.7元，有啲揼心。我話算啦，你兩個月唔夠賺咗15%，仲想點，錢落咗袋才是自己的，記住「有胡唔食，罪大惡極」。即使中海外升到22.3元(今年高位)都唔好恨，記住自己唔使兩個月賺咗15%就得啦，唔沽落番去又係一場白做。股神巴菲特一年回報都係15%咋，你一年走一轉，賺15%，若然有幸走多一轉賺30%，好強啦。當日書展有個讀者話，佢都係跟咗我在17個幾買中海外，亦係上星期走咗，不知幾高興。我叫佢將來又見中海外回至17個幾時可以買番，或者在中海外跌番到17個幾時買萬科(2202) 。
另一個女讀者問我，佢揸住隻中移動(941) ，成本價40元，最近升到81.6元，問我好唔好沽？我問佢其他有乜貨，原來佢亦有32元的國壽(2628) ，家得番20.5元。兩隻股都買入好長時間，都係無郁。我話國壽有唔少股票投資，內地股市低迷，當然無運行，股價郁都唔郁。但佢持有的中移動升咗上去，咁又唔怕分段沽番啲中移動出街，例如先沽一半，等佢升高啲(比如85元)或者佢出埋半年業績後，沽埋另一半。
高位沽貨 套現低揸
唔知中移動第2季業績係咪有驚人突破(唔易有大突破)，所以春江鴨先炒，抑或只係炒吓落後股，總之最近輪到炒佢。佢3月低位63.65元，升到早前高位82元，升咗28.8%，但升到家市盈率只有10.5倍，佢手持好多現金，所以好可能因為個市話跌話跌，跌極都跌唔到落去，就炒吓中移動呢啲落後股。
股壇老雀形容呢啲係藍燈籠股(見到佢掛出來就有死人)，見到佢哋升開始要小心。個市炒完好股先至炒衰股，先至升到呢啲股，所以手上有貨食吓胡無壞。我同那個女讀者講，沽完中移動個市再升亦無所謂，佢仲有啲咁高位買嘅國壽，有排都未見家鄉啦。佢高位沽番啲中移動出去套番啲現金，又點知唔可以低20%(即係65.3元)買番呢？若果操作得好，個組合有啲出入，可以增加回報，好過幾年郁都唔郁。
呢種在高位將部份貨沽出套現的方法(不用全部沽清)，最大風險是遇上一個罕見的大牛市，好似2007年那一種，太早沽貨就好傷。不過我認為，一來叫你沽出一部份，不是全部清倉，萬一遇上大牛市都唔怕，仲有貨。更重要的是港股唔得，因為內地股市唔得，A股唔得因為內地經濟進入轉型期，兼且銀根較緊，中國經濟即使好轉都會慢慢發生，所以內地股市唔似會爆升，港股就好難出大牛市啦。
讀者見我叫中線客沽貨，問我對大市點睇，我話主要睇美股，美股不斷創新高，港股跟唔足都跟五成，所以美股未跌，港股亦未跌得住，暫時仲係輪流炒階段。但到美股回吐之時，港股都要跟跌。即係短期順美股勢繼續炒，睇長少少要小心有一浪較像樣的回吐。
順勢而炒 唔講盈利
先講繼續炒。炒股其實都係搵理由炒吓，唔只炒國策股，亦炒到業績股，炒到呆股，一個行業一個行業咁炒。唔好信晒那些炒作理由，例如係國策。很多讀者問我各種國策對股份的影響，我話係有影響，但要在業績反映出來，可能要到明年3月公佈今年全年業績之時才見到，但如今大市在高位無嘢做，個別股份都炒得幾癲，例如那些AH差價股，又或者國策股，有啲股家個價已經反映咗國策利好因素，舉個例有隻股一個月前1元，家炒到1.3元，你以為將來有國策利好佢可以繼續炒上去，其實佢炒作只因為大市搵嘢炒，到大市回吐時，佢又可能跌番1元，到時國策無變，只係市場變咗，所以要留意基本因素，短炒時不可盡信基本因素，不要只睇佢盈利升唔升，否則佢跌時你以為佢有基本因素好堅，盈利會上，唔識走，好論盡。
要搵理由炒亦有好多理由。其中一個係阿里巴巴上市，佢最快在8月底、較遲就在9月在美國上市。據阿里巴巴向美國證券交易委員會提交的IPO文件披露，阿里巴巴向員工發出的購股價每股估值，由50美元上調至56美元，令阿里的估計市值由1170億美元，上升至1300億美元。美國市場人士更指，阿里巴巴上市後市值可以炒高至2000億美元。騰訊(700) 現價122.9元，市值11482億港元，換成美元是1481億美元，接近阿里巴巴自行估計的市值，若阿里巴巴上市受熱捧，騰訊或有進一步炒作空間。
預示加息 調整期到
騰訊近期升幅跟唔上美國科技股，美國納指和谷歌股價早已升穿高位，但騰訊股價距離高位129.2元，仲有5%差距，騰訊會唔會再上高位，除了睇騰訊半年業績之外，更重要係睇阿里巴巴上市快，還是美股回吐得快啦，睇嚟阿里巴巴上市係美股短期走勢最後一劑激素。美股有少少位高勢危，炒股的朋友應順勢而炒，唔得就走。
至於美股幾時回吐，家杜指、標普、納指都創咗新高或近年高位，走勢甚強，早前好多人估杜指破17000點就回吐，但佢都唔肯回。我話咁短期走勢難測，較可能的回吐位是聯儲局明示明年要加息時。好似去年儲局在6月預示年底開始收水減少量化寬鬆，債息急升，股市就回。若然今次又係早半年前預告，估計佢明年第一、二季開始加息，咁9月打後，聯儲局開口示警明年會加息的機會不低，佢一預警，債息又升，股市就回。
最後總結一下在書展見讀者網友的感覺。第一，讀者普遍說睇呢個專欄的最大得着，是無咁亂買股票窩輪，輸錢少了，以前真係亂咁買，買完又輸，輸完又買，完全唔識計數。第二，比較好的經驗係買中好股可以長揸。有個讀者話騰訊近200元時，我叫過大家買入作長期投資(應是2011年中)，佢買完隻股後來跌到160元，好彩佢買得唔多，頂得到無沽，揸到今天賺唔少。另有讀者多謝我在2012年和黃(013) 60幾元時叫佢買，佢買咗好多，揸到家好開心。
第三，另一種賺錢經驗係利用大市波動進出，例如買中海外，高沽低買。但好多讀者話唔易執行，主要是升的時候唔想沽，跌的時候又怕唔敢買，我話已經揀咗啲唔會執笠的股份畀大家走波幅，例如中海外或恒生H股指數基金(2828) ，萬一買錯可以揸吓，唔會死，所以低位要敢買。3月底隻2828跌到95元時，我叫大家分段買，即使買唔齊都有啲貨在手，家走都執12%。高位亦要敢沽，唔好對啲炒波幅的股票太有感情，沽咗食咗先至係真錢。沽完等佢回落到低位用同一筆錢買番，又多執10幾個%，咁樣複式增長，幾和味㗎。
有唔少人話高沽低買唔易執行，我反問一個讀者你「你有幾何最低位買，最高位沽？」佢答我話「無試過」。我話「咁就得啦，但大約在低位分段買，在高位分段沽，唔使一次全部入，一次全部出，咁心理上好過啲，唔好預自己食到盡，一次食到10幾個%已經好正啦。」
陸羽仁
金融High Tea 舊文