金融High Tea 2014年7月30日
食飽等買平包
2014年07月30日
港股一如預期，由大戶揸𨋢夾上，唔肯畀佢停，大市略為高開，到下晝升幅擴大，指數差不多係高位收市，繼續挑戰近年新高，家目標係兩萬五千點心理關口。
中字派輪到孱仔威
大市昨日強弱勢股齊上，落後股份好似國壽(2628) 都升咗上去22.9元收市，有中環茶友笑佢係「孱仔威」，皆因過去一年，壽險股受內地A股不振影響，基本上跑輸大市，國壽因為本業麻麻，係成個板塊中表現更加唔突出，但係資金追捧A股概念下，佢都可以一度升穿23元，收報22.9元，足足升咗3%有多。
國壽係去年跌咗落嚟，一年底位係18.2元，家回升兩成幾，市盈率係約20倍，數字上唔係平，仲有就係佢A股平過H股。如此底質，唔怪得茶友笑佢係「孱仔」，家資金走去炒佢，一個理由係內地息高咗啲，而且A股今個月好番好多，理論上對佢盈利有直接幫助。當熱錢炒A股基金炒到開巷，有相似概念嘅孱仔都威番陣，但佢威得幾耐，就要睇A股表現啦！
美國聯儲局議息會議前夕，房屋銷售出乎市場預期下跌，美股先跌後微升。由於港匯續強，加上內地股市造好，港股連升第六個交易日，恒指累飆1252點。恒指收報24640點，漲211點；國企指數收報11122點，漲49點，成交額近887億元。
除咗中字派，香港幾隻大型地產股又再發力。摩根士丹利又出口術，預期今明兩年香港樓價分別升5%，地產股幾乎全線飆升，恒生地產分類指數升2.45%。地產股係第三季累升唔少，家外資仲嚟翻炒，新地(016) 、長實(001) 、恒基(012) 三大龍頭同創一年新高。
最過癮係同一時間，市建局宣佈觀塘重建流標，出現地產股高價有人買、地皮高價無人買的怪現象，主要睇有無人幾時唔熟性，真係大力去篤爆佢。
有茶友話，最近呢一浸發展商賣樓，累計今年發展商已套現近千億元，等如去年全年賣樓數字。喺咁環境下，佢哋完全有能力買地，又或者堅持唔平價賣樓。家市建局塊地流標，反映佢哋抱住「食飽買包」、等投風流地的心態，一啲都唔急，所以大型市區項目流標，對地產股變咗好消息囉！
酷派好友大義滅親
個股方面，高盛發表研究報告，將酷派集團(2369) 評級由「買入」下調至「中性」，剔出確信買入名單，目標價2.2元，理由係雖然集團上半年發盈喜，但由於4G手機的銷情或低於集團預期、中移動(941) 重啟三模手機的補貼增加市場競爭、集團的電子銷售面對更大競爭，令盈利前景受影響。
該行因此削酷派今後三年盈利預測8%、29%、34%，大行唱淡下，酷派昨日收報1.86元，逆市下挫5.6%。高盛一直是酷派好友，如今咁講，持有酷派的股東宜審慎，唔好揸咁重貨。
陸羽仁
金融High Tea 舊文