金融High Tea 2014年8月20日
大戶秘訣
2014年08月20日
港股升勢欲罷不能，二萬五關口阻力唔細，但好友不斬樓蘭誓不還，指數喺下午再發力，最後成功攻克呢個心理關口。不過，大市升到6年高位，加上市場氣氛暫時仲唔係大旺，兩萬五呢個關口有可能會有攻防戰，繼續拉鋸吓唔出奇。
昨日個市升，但呢排升勢不斷嘅中移動(941) 終於唞吓氣，我喺今期《東周刊》專欄講吓點睇呢隻風頭躉，有興趣嘅讀者不妨搵嚟睇吓。至於今日不妨再拆拆局，講吓另一隻散戶好鍾意買、呢排都升咗好多嘅房託基金領匯(823) 。
領匯爆上要識拆局
領匯今個月冉冉上升，昨日再升3%，市場炒作有兩個理由，一係佢又有動作，買入咗嘉里喺黃大仙嘅商場；二係恒指可能納佢入成份股。
先講買商場，領匯喺中九龍有幾個龍頭商場，呢次增持無錯係有策略性安排，但私人發展商肯賣嘅嘢，平極有個譜，加上交易只係十零億元，以佢市值1075億元，單日上升嘅市值，都超過30億元，成個商場送畀領匯，都唔值得升咁多啦，所以呢個消息基本上係無關痛癢！
至於話佢入成份股，講起嚟就似樣啲，呢樣嘢亦涉及公司管理層嘅策略。因為領匯上市時以房託形式招股，政府為了政治理由，仲整咗好多緊箍咒落去；經過多年變遷，領匯管理層不斷爭取鬆綁，想擺脫上市時嘅限制，可以做多啲嘢。不過，就算真係咁，佢都係變番間上市地產投資公司啫，同其他大型收租股比，又係咪咁值得睇好先？
技術上嚟講，領匯如果做到成份股，可能吸引追蹤指數的基金買佢，但你睇既然匯控權重話要減，個價都唔係跌得咁多，領匯入到指數帶來刺激，似乎唔係咁大噃。所以，領匯上升唔係單一因素，部份係基本性，部份係炒作。有個重要基本性因素無乜人講，係近日有資金流入股市，香港係其一，部份熱錢炒高啲收益穩定嘅股份，呢樣嘢同美國債息迭創新低有關。
領匯做嘅係中檔市場，收入穩定，加上有派息比率約束，性質同債券有啲似，所以佢同電盈(008) 、中電(002) 呢啲公用股，就齊齊被人捧高。按照呢個分析，即係話領匯造好同美債有關連性，咁大家就要多留意美債表現，同埋諗吓已經去到低位的美債，仲有幾多上升空間嘞。大戶炒股，最叻係愈沽愈高，佢哋點樣做得到，秘訣之一係永遠唔好話畀人聽佢炒上嘅真正理由，而係製造一啲令人入信嘅「好消息」，等啲投資者好似跑狗場嘅獵犬追住隻電兔，咁日後先可以一網成擒。
內銀業績 上落任炒
至於港股家就向北望多過向西望，烏克蘭局勢緩和，配合美國住宅建築商信心增強，美股應聲飆175點，但港股開市仲係悶住想跌，之後內地股市向好，恒指先喺低位抽升246點，恒生指數再創逾6年新高，企穩25100點以上收市。恒指收報25122點，升167點。傳騰訊(700) 及國壽(2628) 入圍收購中石化(386) 千億下游業務，加上上石化內地A股漲停板，呢系列股票或者會借消息炒吓。
唔少公司派業績惹人關注，華潤置地(1109) 中期多賺13%，同時擬向控股股東收購資產，股價隨即飆7.6%。中行(3988) 中期賺897.24億元人民幣，增長11.15%，不過不失，由大行今日唱好抑或唱淡，就知佢哋想炒上定炒落。
陸羽仁
金融High Tea 舊文