金融High Tea 2014年9月11日
美元上 警號響
2014年09月11日
港股借住美國就業數據勁，在有可能提前加息的消息刺激下，港股開市就插咗落嚟，跌幅比較多係同近排當炒概念有關的股份，好似中移動(941) 、騰訊(700) ，都係指數大插的元兇。中環茶友話，陸Sir，你講過蘋果出新手機同阿里上市，呢兩場大龍鳳上演，加上摩笛響起睇恒指三萬三點，咁多好消息湧出來時，唔知個市會唔會反高潮呢？點知個市就真係跌咗落嚟，仲插成500點。
匯價強不利中港股市
我同茶友講，個市急插表面睇真係同呢啲消息有關。昨日跌得最勁的都係幾隻消息股，好似中移動因為蘋果公佈首輪新機推出地區名單，中國榜上無名，於是被人猛沽，一口氣隊穿百元大關。
騰訊亦因為阿里巴巴上市定價比較低，成為被人質低的藉口。不過，除咗呢啲一眼睇到的原因，我認為仲有深一層現象，值得更加重視，就係美元呢幾日急升。
美元呢排急升，道理本來唔難理解。歐洲唔掂，歐洲央行被逼放水，歐洲出現美式量寬看來難以避免，加上日本同樣要狂印鈔票頂住經濟，美元上升變成順理成章。至於觸發上一輪急升，就係美國就業數據好過預期，市場估計有可能比預期提早加息，美國債息聞聲由低位回升到2.5厘樓上，美元同一時間就標高。美國係中港最大出口市場，匯價又掛鈎，美元上升，對內地同香港都唔係好事。可以咁講，阿里上市或蘋果賣機係短期消息，美元攀升就係中期趨勢，恐怕影響唔會一浪就結束，所以買賣港股開始要小心啲啦。
茶友問，歐日經濟樣衰，美國相對靚仔，美元匯價上升乜唔係預咗咩？咁照計唔使太驚喎！我就答佢，美息升、美元強確係預咗，但就算預咗都要睇上升幅度同市場反應，今次美國加息訊號唔算好強烈，但美元上升力度就頗急勁，咁即係話當加息訊號再明朗時，美元加債息兩者仲有再上空間，屆時股市所受的壓力會再加大。
要留意係，美國匯息向上，是實體經濟好帶動，但美元強會帶動人民幣匯價推高，但中國同香港本身狀況唔係咁健壯，經濟仲喺下調周期唞氣中，匯價轉強，影響出口，不利影響更明顯，呢個憂慮投射到市場，所以你見到港股跌幅會勁過美股，甚至因為流通性大而跌得多過內地股市好多。
呢個亦係我覺得美匯急升，緊要過內地電訊商無蘋果新手機賣或者阿里上市定價平的原因，中移動昨跌2.6%，但工行(1398) 都跌2.4%，中國未有iPhone賣無理由影響到內銀，由此可見跌市不單只為表面因素。家美匯升係警號第一次響起，建議投資者要留意呢個訊號，睇實美元會唔會再插，因為佢可能會預示個市中期係咪會轉勢。
金九銀十開局賣樓慢
由於市場關注美息去向，恒指裂口低開221點後愈走愈低，全日最終收報24705點，大跌485點；國企指數收報11117點，跌290點，成交金額797億元。50隻藍籌多達48隻錄得跌幅，無成份股錄得升幅。
仲有一單負面消息，內地有報道指金九銀十開局首周，北京樓市成交量較上周回落45%，市場擔心地產發展商難以達至全年目標，拖低內房股股價。
龍頭萬科(2202) 挫2.7%，造15.02元，潤地(1109) 就跌4.8%。要關注若內地賣樓呆滯情況持續，會唔會有更多內房公司伸手集資，影響咗市場對呢類股票的信心。
陸羽仁
金融High Tea 舊文