金融High Tea 2014年9月19日
溫馨提示
2014年09月19日
美國聯儲局議息揭盅，局方深喉《華爾街日報》記者希爾森拉什(Jon Hilsenrath) 繼續有料到，佢之前預告聯儲局繼續以「將在相當長時間」(considerable time)維持0至0.25厘超低利率不變」應驗咗，不過，耶倫都唔係乜都無做，因為細看儲局對明年利息中位數預期，就比原先略為提高，暗示咗加息時間會提早或者加息幅度會提高。
個市靠滬港通撐住
呢個溫馨提示對美股無乜影響，杜指輕微升咗24點收市，到咗香港開市反應就唔同，好快恒指就跌咗落嚟，跟住喺低位浮沉。關於今次儲局結果，我認為唔能夠只睇股市，比較有啟示反而係金價同債價。
股市表現同息口有關，同時都受實體經濟所影響，如果息口升經濟好，股市未必會跌，呢個情況喺加息初期好多時都會出現，反而金價同債價，同利率表現關連性極大，你睇美國儲局議息後，金價跌咗落嚟同債價表現唔係咁靚仔，就反映咗市場預期息口會上揚。
美息升、美元強，對港股唔係咁好之餘，有金融區老雀話，滬港通仲有一個月多啲就開通，早排個市衝上兩萬五千點後，擺明唔係咁夠力再谷，喺咁嘅環境下唔通任得個市企係度咩！咁不如「隊」番佢落嚟仲好啦。
滬港通蓄勢未發，好似一啖真氣含係個肚度，照計點都有啲支撐效果。鄧普頓新興市場執行主席麥樸思就估，「滬港通」推出後，港股的交投料更活躍，推高整體大市成交額。
他相信滬港通的發展步伐不會太快，料中國政府會循序漸進地開放該機制，旗下恒常投資組合將會增加A股的配置，睇嚟新安排點都會增加外資對中國市場的注意力。
恒指昨日低見24103點，但24100點附近有買盤吸納，大市喘穩後尾市跌勢放緩，似乎開始有啲支持。恒生指數收報24168點，跌207點；國企指數收報10799點，跌93點，成交金額接近702億元。個市調咗咁多，加上儲局消息唔理好醜都已曝光，跟住就等睇有乜消息帶動恒指反彈。
德銀指內地太陽能產品需求近兩周回勇，光伏股逆市造好。保利協鑫(3800) 升4.15%，收報3.01元；卡姆丹克(712) 漲2.7%，收報1.52元；信義光能(968) 都彈咗3.46%。
由於外資注重咗A股，德銀又發表報告，續唱好內地保險股。佢話，內地各保險公司保費收入不一，當中壽險保費收入上月由按年下跌的41.4%至增長22.9%，其中中國太平(966) 受惠代理銷售強勁，上月保費收入增22.9%，抵銷銀行保險銷售疲弱。
新股再度熱鬧
德銀對內地財險及壽險業務維持正面，預期財險受惠競爭減少及下半年純利改善，行業首選為太保(2601) 、中國太平及中國財險(2328) ，當中太保資本強勁，中國太平則估值被低估，而財險直接受惠財險業務復甦。
新股近日熱鬧番，蚊型股建築業承建商創業集團(2221) 今日掛牌，暗盤市場報0.93元，較招股價0.86元，高8%。該股超額認購396倍。另外，內地租車公司神州租車(699) 暗盤報9.5元，較招股價高12%，該股超額認購201倍。
登場招股嘅有內地中廣核美亞(1811) ，今(19日)起公開發售，招股價介乎1.57至1.73元，入場費3494.88元，由於性質都算特別，加上大摩做保薦人，小小哋可以抽吓。
陸羽仁
金融High Tea 舊文