金融High Tea 2014年9月25日
衝浪睇潮流
2014年09月25日
港股連跌多日後，下試一百天線初步見支持。9月份好快又接近結算，後市能否進一步反彈，焦點之一是在於「滬港通」效應及開通日期。
結算前彈力唔算勁
喺蘋果新手機應市同阿里巴巴在美國上市兩個大好消息玩完後，滬港通要接力上。上周A股開戶數目創兩年半以來新高，今日市場又憧憬「滬港通」即將通車，內地證券股走高。中信證券(6030) 飆5.7%，造18.54元，是表現最勁國企指數成份股；海通證券(6837) 都升3.66%，報12.46元；銀河證券(6881) 亦升3.44%，報5.71元；另外，國泰君安(1788) 、中州證券(1375) 都造好。
證券股炒炒吓，匯豐中國PMI數據出嚟OK，內地上證指數再升1.5%，逼近今年高位，呢排孱孱哋嘅港股都見到支持，恒生指數終於見反彈，全日先跌後拗腰回升，全日漲近百點，恒指收報23921點，升84點；國企指數收報10716點，升147點，成交金額752億元。由於個市回升力度唔係咁大，加上結算在即，暫時仲未敢講個市係咪可以再彈。
昨日比較特別係軍工股炒上，市傳中航工業(232) 獲注入非航空業務資產，股價勁升21.82%，收造0.67元；中航國際(161) 隨之彈上11%，收5.14元；中航科工(2357) 都漲5.48%，報5.58元。
家市場炒作緊中港股市互動，有時又話10月底啟動滬港通，有時市場又傳話要押後，個市隨之而波動。聽權威人士話，滬港通機制技術上應該無大問題，見唔到有乜需要押後開通，去到月中就會正式有公佈。
呢兩日公佈業績的公司，反應有時好怪，好似思捷(330) 轉虧為盈，但被大行唱淡跌咗落嚟，粵首環保(1191) 發盈警，預期截至7月底止全年虧損大增，主要由於聯營公司之投資已重新分類為可供出售金融資產，可供出售金融資產面值將極有可能作出進一步減值。不過股價不跌反升，收報0.244，升近一成。
近日炒賣殼的股仔萬威國際(167) 調整一日後又再炒過，大升兩成。仲有曾經被稱為抽水大凌(211) 股價爆升，集團表示未知急升原因，收造0.375元，狂升56.9%。
大股近排難炒，資金轉移去炒股仔，呢排日日都有批股仔發力炒上。有中環茶友揚言，鍾意炒股仔多過炒藍籌，皆因細細粒容易食。
市悶反利炒股仔
對於炒乜股，陸羽仁立場係各師各法，總之搵到食、賺到錢就係好方法，最緊要係自己適應到玩法，最後可以獲利離場。有人喜歡炒藍籌，貪佢夠實力有得守，只要吼中一兩隻自己的心水股份，捉到佢價位上落，低就買吓，高就沽吓，一年落嚟回報可以相當唔錯，呢種方法勝在穩陣，因為藍籌好難一插到底，總係有離場機會。
不過，藍籌炒上落都有風險，就係買中佢進入長期轉勢變弱股，今年的例子就係濠賭股，由於佢一浪浪插落嚟，若然唔小心冇定好止蝕，咁就有可能綁住無得轉身。
炒股份好似茶友話齋，勝在本錢小，贏輸可以係一日間，而且有時唔受大市氣氛影響。好似呢排個市悶局，反而有啲錢走出去炒細價股，要留意係炒細股潮流快來快去，特別係同個市有關。假如個市好旺，大家炒正路股份都搵到食，咁細價股炒賣興趣自然減低，所以家佢沖浪而起，股民可以湊熱鬧衝浪一番，最重要係一邊衝，一邊要打醒精神，留意幾時潮流改變。
陸羽仁
金融High Tea 舊文