金融High Tea 2014年11月5日
輪炒醜股
2014年11月05日
全球投資市場焦點，近日落係日本量寬之上。日圓匯價散過蛋散，搞到中環排晒隊換日圓，在日本狂印銀紙下，資金即係覺得美金原來已經係好可信嘅貨幣，於是熱錢唔少走咗去美國，令到美股連創新高。
雖然美股造好，但港股明顯跟唔上，日股大升448點，港股跟人抽高一吓就回，指數全日呆呆哋。大市主要炒個別，跌得較多係石油同濠賭股，恒指低開後幅一度擴大至100點，低見23815點。之後一度倒升101點見24016點。及至午後大市升勢不保，最終跌穿23900水平收市。恒指收報23845點，跌70點；國企指數收報10727點，升67點，成交金額由昨日的642.7億元，增加至708.5億元。大市無方向，資金唯有搵嘢輪流炒，不過，炒作對象就跟主要內地股。好似呢排軍工股升得勁，主要係因為A股都係炒緊呢個概念。受廣船(317) 獲母注資變身軍工股憧憬，呢個概念繼續起哄。中航工業(232) 大升13%，造0.87元；中航國際(161) 升8%；廣船則再彈6%，收報25.1元。
鋼鐵航運股彈上
軍工股升得多，開始見到A股炒吓衰股、醜股，其中一個例子係鋼鐵股。表面上鋼鐵股係跟鐵路股炒上，實際上係好股升咗咁多，資金開始搵啲平平哋嘅衰股炒吓。總之，呢類股份宜炒不宜揸，記得隨時執生囉。
搵嘢炒作要睇大陸炒啲乜，另一個例子係航運股。航運股近日郁緊，市場俾嘅理由係波羅的海乾貨指數升近2%，推動碼頭航運股走上，中國遠洋(1919) 升3%；同系中遠太平洋(1199) 罕有成為藍籌升幅最大股份，全日揚2.3%，報10.6元。除咗年尾係貨運旺季同油價下跌有利航運股外，最近四中全會後開始全力推動海上絲路發展，都增加咗炒賣氣氛。
滬港通未有料到
中國現屆政府全力推動海上絲路，發展貿易，既係推動區內經濟，同時有借經濟牌抗衡美國重返太平洋戰略的政治味道。呢兩日區內人口大國的印尼，就借亞太經合組織會議，想同中國加強合作。有分析估區內經貿交往增強，會對航運有需求。呢個分析啱唔啱，要長遠至知，但炒股只爭朝夕，總之大家就起哄先，反正航運股雖然都係醜股類別，但勝在夠平，兼且有油價低嘅因素墊住底。
趁住亞太經合組織會議，香港特首都會上去參加，仲講到會爭取早日開通，聽到呢個消息，港交所(388) 又再彈升2元，個別中資證券商股炒賣重燃。特首講話會爭取滬港通啟動，有中環茶友就問，佢咁講得，係咪收到料阿爺會開綠燈？
如果你有聽清楚特首嘅講法，佢話稍後到北京出席會議期間，會尋求支持滬港通盡早開通。不過，佢仲話大家同時亦應知道，香港作為一個國際金融中心有兩個重要條件，第一是社會秩序，第二是法治環境。佢仲話，過去個多月，本港社會秩序出現了問題，部份人不但不守法，還在法庭頒佈命令後抗拒命令，所以本港在爭取滬港通及繼續發展成為國際及國家金融中心的同時，亦需要全社會配合，希望本港能盡快恢復社會秩序。
聽佢咁講有兩個意思，一係滬港通唔通，係同佔領運動有關(呢個講法同其他財金官員好唔同)；二係啟動滬港通爭取還爭取，得唔得根本係未知數，所以如果炒緊呢個概念嘅股份，見佢升得急，都可以諗吓係咪食咗胡再博第二轉啦。
陸羽仁
金融High Tea 舊文