金手指：梁齊昕點爆紅
■如讀者有跟本欄早前推介沽日圓，應可體驗出悶聲發大財嘅原理。 資料圖片
投資市場又再陰陽怪氣。首先睇貨幣政策，聯儲局放風講啲唔講啲，唔似快加息，人民銀行早前減息，又搞到大家覺得放寬應為主流，咁照理就應該一注獨贏買嘢升。不過，睇啲花旗國長期國債，息口係咁跌，同時公司債息又係咁升，示意最聰明嘅錢搵地方避難，避經濟逆轉帶來嘅走數風險。好啦，如果啲公司會有機會走數，啲股票又應該會跌，不過喺花旗國又長升長有。
病市中沽日圓穩賺
大陸又係咁。睇喺上海銀行與銀行間互借錢嘅利息，銀行又似乾塘，甚至人行早前減息後令公司借錢反而貴咗。喺咁嘅大環境，股票特別係國內啲股票又冇理由升，但又真係好硬淨。呢啲大勢仲要成個12月都係咁，睇恒指噚日收市，其實同一號嗰日差不多位，但由嗰日至今已有千五點波幅，問你點炒？
有見及此，不得不講句孫柏文喺病市倍感安慰。因上周二我都講過，打生打死，不如唔聲唔聲穩賺。度股票咁辛苦到頭來成個12月至今得個吉，不過如果你跟我嘅推介，一注獨沽日圓，仲要好似我話喺臨日本大選前加沽，已經穩賺。雖然咁樣部署，會令嗰啲視投資為精神寄託嘅人好悶，不過就體驗出悶聲發大財嘅原理。
最後，我睇咗友報獨家訪問梁齊昕，佢就直認有想過做model。講真，老竇阿媽係邊個冇得揀，不過如果有啲牌一生出就有，亦唔怕打出來。我絕對覺得梁齊昕有能力做港版Kim Kardashian或Paris Hilton。
大家唔好笑嗰兩位為「得個出名、冇料到」，佢哋呢類人其實叫celebutante。Paris憑贊助商品、做「職業賓客」等，收入超過7億元，而Kim就有個遊戲app對上一年收入超15億元。而作為一個睇過梁齊昕內衣照嘅人，我覺得佢個名、故事、經歷足以爆紅大中華。現萬事俱備，只欠春宮自拍片「被盜」。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文