中環在線：萬達王健林軍訓式管下屬
高層開會冇打呔即罰錢
■王健林對下屬有嚴謹要求，令佢哋全部都戰戰兢兢。
今日掛牌嘅大連萬達商業（3699），大股東王健林有超過1,900億元身家，喺內地冇人唔識，除咗商業地產，仲有酒店、娛樂事業等等，做得咁成功當然有些少秘訣，王健林年輕時曾經參軍，聞說佢從商之後，以軍訓模式管理公司，下屬全部都戰戰兢兢㗎。
先唔好講要聽話、服從、做到嘢呢類咁基本嘅老闆要求，王健林對下屬嘅衣著都有嚴謹要求，呢點可能同軍人重視紀律，制服要整齊有關。
半夜向員工落柯打
聽聞，萬達喺內地各個城市嘅阿頭每個月至少要到北京跟王健林開一次大會，滙報工作情況，曾經有阿頭因為忘記打領呔，而被王健林話一輪兼罰錢，好似要罰過千元人仔咁多㗎。普普通通嘅話，過千元人仔應該買到十條八條領呔，呢個教訓都唔算平。
王健林對於下屬嘅評核亦簡單直接，目標為本，佢會安排唔同人管理內地不同城市，全部都要跑數、達標，做唔夠數就會被調去一個更難搞嘅地方，能夠力挽狂瀾當然有得翻身，否則就可能要黯然離去。
此外，王健林同好多超勤力嘅老闆一樣，精力旺盛，好似都係唔使點瞓覺，聞說隨時會半夜吩咐下屬辦事，下屬亦將半夜三更開會視作等閒事，而且講咗就要馬上做㗎。
其實每位老闆都有自己嘅獨特個性，身家有番咁上下嘅更加係㖭喇，不過今日嚟講，王老闆應該最關注萬達商業在港掛牌嘅股價表現，事關成個孖屐都關注王老闆會否因為萬達市值飆升，而令到佢身家水漲船高，贏阿里巴巴創辦人馬雲成為中國首富。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文