異動空間：短線咪逆市而行
年尾總結，發現今年最重要係識轉膊，概念股唔識走會由贏變輸，識換馬才是王道。年頭手遊股極速炒完，轉頭又炒滬港通大折讓股，點知港交所（388）復牌當日就係出貨之時，第三季大家睇實升幅榜捕捉異動殼股，真正賣盤嘅多，定係中伏嘅多呢？去到年尾資金湧進中資股，二三線股全面散水，唔肯斬嘅就越輸越多。
散戶如此，基金又如何呢？惠理（806）揸唔少中資股，但重注落喺藥股，自己嘅走勢亦變成弱股。今年最成功基金肯定就係ETF，南方A50（2822）全年升四成，令好多識揀股嘅基金經理汗顏。
半年前有大行建議，AH差價提供套戥嘅獲利機會，參考恒生AH股溢價指數，喺港交所4月宣佈時指數約係96點，之後跌至90點，至通車前一周先升到100點，消磨咗半年意志才勉強達標。隨著A股在11月尾發力，溢價指數升至105點，若滬港通已有A股沽空機制，不少專業投資者或會沽空A股買H股，那就不堪設想，因A股挾到你唔信，溢價指數一度升至128點，認真便輸死了。學曹Sir話，有智慧不如趁勢，現階段唔敢買都唔好逆市而行。
魏力
http://www.facebook.com/2012jason
魏力
異動空間 - 魏力 舊文