金融High Tea 2014年12月31日
跟車有法
2014年12月31日
昨日係期指結算日，美股只是稍稍回軟，但港股低開後就回落，周初開市大部份升幅蒸發。由於臨近埋數，淡友力壓指數已在預期之內，仲有半個交易日，個市叻極有限，市況好壞要等下周新年度重開才見真章。由於今年其他市場表現不壞，基金經理花紅已經心中有數，不必大力砌靚港股盤數，不如疊埋心水明年再戰，下周新年開局股市榮辱，啟示性比較大。
追得太貼有風險
我喺網誌講過，基金經理年尾埋數，睇嚟好多都未發力追紅色股，大多只是酌量增持，無謂冒險影響年結表現，一唔對路就定位止賺，所以不排除過完年後，機構投資者對H股會變得積極一些，究竟呢個睇法啱唔啱，投資者可以等明年開局留意一下，部署下季搵食策略。
國企股近排雖然表現超前大市，股民陷阱亦都唔少，好似日前大升的電力股，就因為華電(1071) 集團配售A股集資，先升後回，而且仲係大上大落，一度衝高一成後再回插，高追股民食完驚風散仲要畀錢埋單。本來，華電集資係收購資產，消息好壞任人演繹，但由於電力股累升唔少，無論市盈率數字抑或技術走勢都係炒落易過炒上，所以一湧高就有人大力沽貨。內地今年着力振興股市，其中一個目的係想為發展融資，故此印公仔紙發股絕不手軟，貨源供應唔會少，股民在跟炒之時，切記不宜心急高追，需要留意追得太貼，無咗安全距離，咁就好易中伏！
喺集資消息下，華電收市報6.49元，跌4.7%，另一國企海螺集團由於改組，旗下公司紛紛造好，海螺創業(586) 升13%，股民跟呢啲車要留意風險，想上車最好係等佢回一回睇定啲先。恒生指數在國企股回吐後，收市就跌咗272點，報收23501點，國企指數收報11844點，跌176點，成交715億元。
挑精揀肥低吸內房
大市雖然下跌，但國企股比其他類別股份強的情況仍然維持。有好多股民唔敢跟炒國企股，變成有得睇無得食，家「囉囉孿」唔知點好。如果家手頭錢多貨少，見中字股有景又唔敢高追，一個可以考慮嘅跟車方法係低吸吓內房股，因為比較起來，呢個板塊仍然算係落後，低買風險有限，如果個市再上，輪流炒有機會追番上嚟。
內房有一定值博率，其中一個理由，係阿爺想谷高經濟，第四季開始放水，但放水推高股市，產生財富效應有限，尤其對實質需求刺激唔夠大，如果淨係靠金融去谷高經濟，有可能變成「乾炒牛河」，弄不好搞出一個資產泡沫。咁嘅環境下好可能就係繼續放寬對房地產的限制。如果要托住經濟，房地產市場唔可以點衰。
從政策上，阿爺至少唔會再對樓市懷有敵意，雖然係咁，卻唔代表可以亂買內房股，因為現時中央肅貪之風未遏，內房商若然捲入漩渦，咁就相當麻煩；再者，家政策雖然對房地產轉趨中性，但供應過剩始終未解決，買家信心未復，存貨堆積仍然嚴重，有樓無人買呢樣嘢，就算阿爺都幫唔到手。故此，家買內房股唔使心急，最好係手頭有閒錢，買完預咗佢會跌吓。
至於入貨對象，重點應該係優質國企龍頭，最好係發展重點在北京、上海、深圳呢啲大城市，或者係天津、廣州呢類經濟較為活躍的城市，總之就係要揀手靚貨至買，好似萬科(2202) 呢類龍頭股就安全少少。其他民企股如果價錢好殘，買嚟玩票投機無所謂，若然重手入貨，暫時仲未係時候。
陸羽仁
金融High Tea 舊文