油價未跌完
2014/12/15 09:27:03
網誌分類: 經濟
美國消費得，股市跌。上週五公佈的12月份美國消費者指數錄得93.8點，創了8年新高，亦高過市場預期的88.8，美國消費者熱情膨湃，主要受惠於就業情況改善，預期工資上漲，以及原油價格大跌。
不過在消費者興高彩烈的同時，能源業者就叫苦連天，投資者開始擔心能源企業被不斷下滑的油價拖垮，對債市及經濟造成骨牌效應。紐約原油期貨價格上週五再插2.14美元或3.57%至每桶57.81美元能源價格走軟，亦反映到能源消費大國例如中國的需求減少，全球經濟活動放慢。中國國家統計局上週五發布的數據顯示，全國11月份工業産值較去年同期增長7.2%，差過市場預期，與此同時，國際能源署上週五將2015年全球石油需求預期下調了每日23萬桶。
市場出現恐慌，股市自然首當其衝，股市恐懼指標VIX指數上週五就大升上21點的近期高位，上個星期，VIX指數便隨著油價下滑大升74%。美股上週五受能源股拖累，能源股跌到反肚，標普能源股指數重挫2.2%，亦拖累美股重創，杜指勁插316點，收報17281點，跌幅1.8%；標普500指數跌33點至2002點，跌幅1.6%；納指跌55點，報4654點，跌幅為1.2%。
總結全周，杜指大跌3.8%，係2011年11月以來最大單周跌幅。標普亦跌3.5%，為2012年5月以來最大跌幅。納指跑贏大市，跌2.7%。能源股今年累計已經回落近17%，係標普500指數10大類股中表現最差的板塊。杜指成份股艾克森美孚(Exxon Mobile)和雪佛龍(Chevron)均觸及52周低位。
紐約原油跌穿每桶58美元，觸及五年低位，不過，睇嚟跌勢未完。全球最大的資産管理公司貝萊德CEO芬克稱，佢去中東行咗一轉，與中東國家的官員交流過，那些官員都唔知道油價走向，所以佢更加睇淡石油前景，認為價格會進一步下跌。不過佢又認為油價下跌，無疑「全球減稅」，有利全球經濟。國際評級機構惠譽上週五表示，油價下跌20%將在未來兩年提升全球經濟增長0.3個百分點。
油價究竟會跌到幾時至停？我覺得油價跌得咁勁，會令好多經濟不善，規模唔夠大的石油公司倒閉，或者被有實力的石油巨企吞併，見到呢啲消息湧現時，油價就近底啦。油價唔會一永無止境咁一直跌落去，因為石油公司會因為無利可圖而停產，令石油供應減少，供求重拾平衡，油價就止跌。另一方面，油價下跌又會刺激全球經濟，令石油需求見底回升。
上週五， FibonacciQueen.com 網站的分析員Carolyn Boroden，用著名嘅Fibonacci analysis(斐波納契數列分析)預測油價支持位。所謂斐波納契數列或者黃金分割率，指任何價格或指數在高位或低位元元下跌或上升至0.382倍、0.5倍以及0.618倍等重要的位置，都可能是波段潛在的阻力和支撐位。按Boroden的計算，油價的下一個支持位為50至52美元。
不過，我認為油價跌得咁急，固然有其經濟原因，但主要還是政治原因的影響更大，當中牽涉到美國及中東的石油大戰，純粹的技術分析，唔係太派得上用場，參考可以，千奇唔可以盡信。美國加入石油淨輸出國行列，和石油輸出國組織(OPEC)大戰，打破佢地壟斷。石油輸出國組織止唔到油價，索性放手一跌，反挾美國在油價高位投資的油公司，所以油價跌到咁戲劇性。若然如此，油價會跌得快，跌得過份，2009年低位35美元係一個可參考位置。大家記著，任何低位都係靠估，目前睇得到的是「未跌完」。即使反彈，彈完也可以再跌。
港股美國預托證券上週五跟隨大市下跌，ADR港股比例指數較香港收市跌370點，其中跌得最勁嘅仍然係三桶油：中海油(883)
、中石油(857)及中石化(386)，較香港收市齊跌超過2%！ 陸羽仁
回應(0) 我想回應
陸羽仁 BLOG 舊文