金融High Tea 2014年12月11日
想熱唔想癲
2014年12月11日
A股周二大插，小狂牛向下亂踩，搞到兩地股民爭相走避，驚魂甫定下，急急查找死因，睇吓牛市係調整抑或係玩完。內地有分析指，內地股市喺年尾急升，可能同阿爺力挺增長達標有關。
炒熱個市谷增長達標
內地相關分析聽落好科學化，分析者計過數，今年首三季內地經濟都未能達到國務院總理李克強訂出的7.5%增長目標，如果全年要到數，第四季增長要有7.8%，與市場估計的7%有相當距離，咁不足的0.8%增長係邊度搵番嚟呢？家內地樓市仲喺調整萎縮的下坡路，要靠房地產谷數唔係咁易，於是有人提出係咪可以借力股市呢？
按照產值計算的方法，炒高股市產生的財富，係唔可以計入產值之內，但因股市熱炒造成的交易佣金、分紅就可以計數，所以整熱股市，係短期內造成大量經濟活動的方法。如果按照呢個方法去催谷欠缺的0.8%增長率，家應該仲未夠數，即係話如果要借股市提升增長數字，仲要繼續諗辦法維持市況熱度先得，用呢個角度去睇，內地A股唔應該咁快玩完。
咁點解內地股市早兩日又會急插呢？一個解釋係因為內地股民家可以用「融資融券」，即係我哋講嘅「孖展」嚟炒股，由於市況升得太快太急，熱度太高，財金官員驚太多人炒孖展，造成風險急增，一旦回調會惹來社會問題，於是在周初出招，規限證券商發債來借出孖展，保證炒股股民能夠負擔本身的財務風險。當消息一出，即刻搞到個市插咗落嚟。
如果呢個分析無錯，阿爺家對個市去向都幾微調吓，簡單講係想個市有熱度，為增長作出貢獻，同時又要防止佢太癲，搞出太多金融風險。
按照呢個政策思維去諗，中央大方向係想個市好，但是太熱就會出手請股民飲涼茶，如順勢去炒，見到個市插低，特別係跌得深時，而阿爺唔係出手搞個市，就可以出手買吓。相反，如果升得急就要食吓胡，幫阿爺維穩之餘，仲可以儲番子彈買平貨。
可能內地唔少股民都一樣有執平貨心態，A股急跌一日後反彈，惟港股依舊未有跟足，全日只係反覆微升，恒生指數收市重上23500點收市，收報23524點，升38點；國企指數收報11372點，升39點，成交金額1099.3億元，是連續八個交易日成交破千億元。
喺悶市登場嘅新股王中廣核電力(1816) 首日掛牌，開市報3.45元，較招股價2.78元，高24%；其後升幅收窄，收報3.31元，較招股價高0.53元或19%，成交額87.45億元。每手不計手續費賺530元，扣除手續費夠賺餐茶。核電股概念獨特，加上佢市值咁大，有人會博佢消化完獲利貨後炒入指數，不過如果係孖展申請攞得多嘅短線客，有賺頭已經滿意計數。
乾炒牛河要搵伴碟
近年尾，基金開始部署換馬，金融股成為今年第四季贏家，但只係靠金融股推高個市，好易變「乾炒牛河」，最好都係搵啲其他股份陪襯吓，但究竟有邊啲股可以做伴碟呢？其中一樣就係中央「一路一帶」即將出台，中港基建股逆市向上，中交建A股(601800)一度升停板，中交建H股(1800) 變成落注對象，收市升6%；中鐵(390) 同樣走高；中鐵建(1186) 續停牌。
除咗鐵路基建股，近排內地港口股都因為相同概念有炒味，港口股過去唔係咁熱炒板塊，加上內地出口放緩，呢類股份唔太受注意。不過，內地股民鍾意燒冷灶，好多時概念緊要過數字。
陸羽仁
金融High Tea 舊文