魚樂無窮：亂市下尋找換馬對象
■置富短中長線概念有齊，股價有力再上；圖為公司旗下街市。 資料圖片
俗語有雲：水能載舟、亦能覆舟。套用於股市亦一樣︰孖展炒股可以令你贏得瘋狂，也可以令你輸到滅亡。阿爺一聲令下，嚴打違規孖，券商斬倉散戶沽貨是常識吧。咦，點解沽唔到嘅？原來全部跌停板，冇人肯接貨。難怪噚日大跌市，兩市成交只得七千幾億人仔，可以預期，人踩人、火燒連環船等慘劇，將會繼續上演，直至券商孖展水平正常化，大家要有心理準備。
實際啲，講嚇追揸沽策略。如果舊年底開始買上嚟，所持中資股賬面應該仲有利潤，而家短線睇跌，中線睇升，自問技術好，可以先沽部份獲利，候低位再補番。另又可以考慮換馬，券商股冇運行，可以踢佢出局，但內銀內險元氣大傷，一時三刻唔能夠翻身，唔使加注住。噚日提過有勢嘅高息股，反而係換馬好對象。
從牌面睇，置富（778）最有投資價值。避險資金泊岸，主要睇股息回報，置富現價息率4.7厘，比起電能（006）、長建（1038）、領匯（823）平均3.2厘高出一截，先勝一仗。公司聽日（二十一日）公佈全年業績，根據往績，放榜後例牌有一浸炒，夠噱頭。母公司長實（001）正在進行重組，置富現價較NAV亦有折讓，未來有權大量釋放價值，有憧憬。公司短中長線概念有齊，兼即將進入冇蟹貨區，值得投下信心一票。
唐牛
https://www.facebook.com/tongcow88
唐牛
魚樂無窮 - 唐牛 舊文