異動空間：金融股撈底時機
成也阿爺、敗也阿爺，上月社科院仲講緊牛三乜乜乜，四千點、五千點，全民喪炒金融股，孖展亂咁借，結果如以往咁一放就亂。因亂得滯中證監唯有搵幾間大行祭旗，罰打手板唔批新孖展。而新華社突然轉軑，話A股存在四大隱憂明顯要摑醒散戶，篤爆泡沫，結果好自然一收就死，釀成一．一九慘案。
今次係孖展炒上去，升得癲跌亦喪，加埋升跌停板機制，隨時沽唔到貨變人踩人，但散戶唔使驚，阿爺只係唔想個市咁癲，唔係要打沉佢，相信一如以往，A股死一排後阿爺又會放水推起個市，重複去年十一月的升浪。
唔少戰友都問金融股撈得未？答案係未！魏力暫時判斷呢次係調整，唔使大逃亡，但A股半年升咗六成，家陣先跌第一日，點會咁快完？太早撈可以好致命，尤其得一兩注錢，唔應該咁早嘥子彈。重貨者宜先減持部份，降低持貨壓力，以免捱唔住最後低位清倉，呢樣好重要，即使全部實錢持貨，但日日滿倉見紅，資產係咁縮水，隨時壓力爆煲！長江基建（1038）逆市創新高，長和系重組反映誠哥睇好基建資產，三月重組完成前或有力再上。
魏力
http://www.facebook.com/2012jason
魏力
異動空間 - 魏力 舊文