一周三件：江南前景靚絕
■芮福彬任主席的江南集團，得四倍幾超低PE，值博率高。 資料圖片
江南集團（1366）食住祖國各大類型基建工程項目，再加埋沿一帶一路走出去嘅商機，主打輸電系統同電線電纜瓣數，肥過肥仔水，股價啱啱去年十二月中質到落半年底，得四倍幾超低PE，超抵搞。
先睇大環境，祖國喺城鎮化同整治空氣汙染，要突破輸電樽頸兩大前提下，國家電網公司計劃，去到二零二零年為止，喺特高壓電網投資金額，高達一萬億元（人仔．下同）。
預測PE僅4.7倍
又據預測，祖國城鎮化下，同樣去到二零二零年，城市地鐵線路投資，要投放二萬五千億元。至於正係火速前進嘅鐵路項目，按券商嘅預計，阿爺今年會投放八千一百億元。而睇到嘅係，單係祖國各大型基建展開，對周邊必須配套，好似電線電纜行業，已經提供咗勁厚嘅商機。
好嘢仲未講完，阿爺由提出一帶一路嘅重要國策開始，世銀就估計，去到二零二零年，亞洲地區基建資金嘅需求，會上到一萬億美金。江南無論喺本土中國，或者走出去，都係超級肥仔水。
再講，江南係全國第三大電線電纜嘅生產商，集團產品服務，兼有銷到過越南同非洲等國家，已經有走過出去嘅紀錄，喺爭取一帶一路客戶時，肯定比行家有優勢。
場內專業評估，江南就算連埋上年配股攤薄，集團就快派嘅二零一四年成績單，EPS都增長18.5%，到0.25港元。喺咁好景底下，今年江南EPS只係keep住呢個增幅，上到0.3元，現價（1.43港元）預測PE，得4.7倍。祖國行家東方電纜預測PE上到四十六倍、遠東電纜二十倍，中天科技亦講緊十六倍，江南平霸。
買江南，當翻一番到2.84港元計數，預測PE先得十倍，未有耐追到任何嘅行家，陰功。
錢雋
細價股專家
本欄逢周二、三、五刊出
錢雋
一周三件 - 錢雋 舊文