中環在線：超人安排五道菜
宴請小股東
■長實股東會提供嘅五道菜，味道都唔錯。 高淑嫻攝 
長和系主席、「超人」李嘉誠成日都話要照顧小股東利益，除咗爽派股息之外，最實際當然係祭一祭小股東嘅五臟廟喇。長實（001）噚日喺旗下紅磡海逸君綽酒店舉行股東特別大會，一如以往，超人安排好一餐飯畀所有小股東，雖然唔及萬邦投資（158）有埋盆菜咁豐富，但都有麵飯、點心等五道菜，算唔錯。
坐定定等侍應上菜
其實呢餐飯最值得讚係整體安排。噚日有超過三百名小股東晨早九點就去開會，大部份都係銀髮一族，呢班老股東有多年開會經驗，都知道會後有餐飯食。為免引起混亂，小股東登記時會獲發一個枱號，開完會就去指定位置，搵番自己張枱坐定定就得。
唔少上市公司都以自助餐形式畀小股東自己攞嘢食，但此舉通常引起爭食問題，容易發生不愉快事件。長實呢餐飯就由侍應分好曬食物，再逐道菜分畀小股東，等於酒店中菜廳嘅服務。侍應嘅服務亦算係殷勤。現場見到小股東們都可以舒舒服服、打嚇牙骹就食完餐飯。
相對𠵱家好多上市公司，只係喺會後向每名小股東派盒點心拼盤，或者喺酒店以自助形式放些少糕點，叫小股東企埋一邊食就算，對於一班年紀有番咁上下嘅老股東嚟講，長實呢個安排的確幾好。
至於食物質素方面，點心、麵飯都可以，美中不足係欠碟青菜，𠵱家興少肉多菜吖嘛。
聞說長實多年前有魚翅灌湯餃提供，但噚日就只得海皇羹（內有竹笙、魚肉）。聽部長所講，原來佢哋七、八年前已經冇提供灌湯餃，事關當年有小股東帶埋一家八口去食灌湯餃，引起其他小股東不滿，自此就取消咗，之後亦要求有登記嘅小股東先可以入座食飯。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文