陸羽仁 BLOG 2015年2月26日
美股炒上落
2015/02/26 09:27:49
網誌分類: 經濟
美股牛皮悶局，杜指升0.1%，標普500指數跌0.1%，納指打個和。市場比較關注嘅仍然係聯儲局主席耶倫第二日在國會聽證會的發言，不過，耶倫只係重申上日的觀點，對提示加息的態度仍然比較溫和。在回答通貨膨脹問題時，耶倫表示沒有見到任何顯示通脹率很快就會提高的證據。市場人士認為，今日美國將公布CPI數據，按照耶倫咁講，如果通脹率繼續下滑的話，6月份加息的可能性，相信會更低。
券商RW Baird首席投資策略師比托斯(Bruce Bittles)表示，聯儲局認為美國經濟整體表現唔係太過明朗，所以唔會貿貿然提早加息，怕之後經濟唔得又再減息，最好嘅做法就係長時間內維持比較「鴿派」的態度。
昨日有多家零售巨企包括家居裝修連鎖Lowe’s、Dollar Tree、Target派季度成績表，同店銷售都好過預期，成為市場焦點。其中Lowe增長 7.4%，Dollar Tree增長5.6%，Target在加拿大要關閉所有店鋪，裁員超過1萬人，但美國生意做得唔錯，同店銷售期內增長3.8%。不過，與此同時，以上三家巨企都下調銷售預期。而前一日，Steve Madden、 Macy"s百貨及Home Depot也齊齊下調全年盈利預期。令市場對美國零售業前景以至整個美國經濟有點擔心，畢竟美國GDP有七成來自零售銷售。
對此，有紐約交易員指出，由於市場此前並未有因為預計經濟唔好而刻意調低零售商盈利前景的預期，因此，零售商講出來的盈利前景低過市場預期，情況未致於太差。如果差過已經下調咗的預期，就比較大鑊啦。另外，有些零售商發盈警，唔係純因為市道唔好，例如Target就係因為換了CEO上場，所以擔心業績會差過預期。而TJX則表示會加工資及增發花紅，所以會削減公司的盈利。
投資者反而要留心的，好多零售商的股價已經唔平，例如Lowe’s的PE已經去到23倍，Home Depot嘅PE，亦上到歷史新高，買這些股份風險高，未必因為美國零售市道唔得，可能係太貴啦。
我話美股近幾個月都係炒上落，杜指跌到近17000點就反彈，升穿18000創少少新高又回，而家創緊新高，都唔可以太睇好。
有末日博士之稱嘅麥嘉華昨日接受CNBC網站對希臘債務危機有新睇法，幾有趣，值得分享。佢話希臘的債務總額超過3000億歐羅，而以希臘的經濟實力，即使歐盟將還款期延後4個月，基本無解決問題，只係將問題推遲，將個罐繼續踢落去。不過，希臘的債務又唔會咁易爆煲，「脫歐」以至衝擊世界金融。
麥嘉華認為基於希臘位於地中海東北角呢個重要的戰略位置，即使無錢還債，歐盟都唔敢踢希臘離開歐元區，因為怕會造成俄羅斯甚至中國乘虛而入的機會。特別係前者，北大西洋組織（NATO）之所以策反烏克蘭，主要係阻截俄國軍隊進入黑海，威脅東歐儲國，同樣道理，如果希臘脫歐親俄，整個地中海都會受到俄軍直接的威脅，北大西洋組織（NATO）會不惜代價去攬住希臘。
麥嘉華估計美國呢個老大哥最終會出錢救援希臘，避免出現違約而脫離歐美的操制。至於中國，能夠和希臘搞個更緊密關係，估計阿爺會無任歡迎啦，因為阿爺依家搞緊嘅「中國馬歇爾計劃」，無論係海上絲路或陸上絲路，希臘可以講係一個關鍵位置。
中國而家想大力投資希臘的貨櫃碼頭，新政府選舉時好似想翻盤，而家又同中國友好番，睇嚟希臘政府都想打中國牌。結論係希臘難爆煲。
陸羽仁
回應(0) 我想回應
陸羽仁 BLOG 舊文