金融High Tea 2015年2月18日
阿爺焗做莊
2015年02月18日
內地股市馬年「收爐」，兩市雙雙高收，市場持續憧憬中央在春節後，將有更多寬鬆政策出台。中環茶友就問，陸Sir，你估農曆年後會唔會有紅盤開呢？
對於呢個問題，陸羽仁無直接畀答案，只係話農曆新年期間，相信領導人會好勤力開工，推出提振經濟嘅措施，個市點反應，你哋大可自己諗啦！
預期農曆年後勤開工
點解話領導人要勤力開工呢？你睇年尾收爐，好多打工仔今個星期返工都Holiday Mood，個心飛咗去花市或那遙遠的泰國、北海道……但領導人就要齊齊落地方，同大家食吓即食麵、包吓餃子，相當奔波，所以大家唔好以為做大官好過癮，如果你唔係有官癮或權力慾，咁樣過日子都相當辛苦㗎。
領導人搞咁多動作，不外乎想博點掌聲，但講到底做騷都唔夠搵銀緊要，如果經濟唔好，你點落地方都無用。睇番今年開局，成堆數字湧出來都好肉酸，無論對外出口抑或通脹以至貨幣增長，全部低空飛行，連人民幣兌美元昨日收市都創出半個月低位。咁搞法有兩個問題會走出來，一係首季過咗一半，若然數字唔好，勢必增加其餘季度的增長壓力；二係開局若然形成頹勢，好容易一浪比一浪低，喺咁情況下，你話阿爺點可以等？點可以唔勤力開工先？
說到底，搞經濟同炒股做莊一樣，你唔一浸浸炒上，佢就一浸浸滑落，中央見到個勢唔好，就唔可以怠慢。雖然領導人話要講質量，唔追求高增長，但如果真係放手任由經濟自由飛行，咁就唔止無高增長，隨時連低增長都無啦！
時間過得好快，2015年喺過完農曆新年已經無咗近兩個月，就算有招出，出完馬上就3月，跟住開人大政協兩會又畀代表質詢，你話中央會唔會有點心急呢？正因為咁，內地市場已繼續憧憬減息刺激股市連升多日，港股反應較慢，但不代表完全無反應。
除了內地因素，市場都觀望歐羅區就希臘救助方案點發展，結果雙方未能達成協議，歐洲股市下跌，希臘股市低收3.8%。由於希臘債台高築，大筆債款將於3月到期。歐洲中央銀行定於周三開會，到時決定是否繼續向希臘各銀行提供緊急貸款。暫時估計，希臘事件對港股影響有限。
在A股帶動下，港股昨開市不久後已扭轉跌勢，恒指收報24784點，微升58點；國企指數收報11998點，升63點，反映金流向中資股，成交縮減467億元。
炒政策味道漸濃
大市開始有偷步炒政策的味道，雖然到年尾收爐人行暫停逆回購，市場憧憬農曆新年後會有更多寬鬆政策出台，內銀股靠穩。內地股市持續走高，上證指數連升七日，證券商股自然造好，不過幅度唔算好大。
由於春節就快到，市場又借意炒炒航空股。趁住花旗繼續唱好內地航空股，內地三大航空股齊升，國航(753) 揚3%；南方航空(1055) 升3.6%；東方航空(670) 就升1.7%，升幅同A股仲有距離。人民幣弱同油價回升，對內航股均有負面影響，但有時炒股唔係淨係講理智，尤其係炒季節性概念。
花旗唱好內航股，德銀就調升多隻高鐵概念股目標價，鐵路股表現突出。中交建(1800) 升4.5%；中國鐵建(1186) 、中國中鐵(390) 都升逾2%，大家預期兩會都會再拎「一路一帶」出來講，基建股靜了一排，股價經過了一輪調整，看來大行有點按捺不住，先走出來唱番一浸。
陸羽仁
金融High Tea 舊文