金融High Tea 2015年2月6日
食完補藥自淋冷水
2015年02月06日
中央突然出手降低銀行存款準備金率，呢吓突如其來出手放水，令上一日夜期同外圍A股衍生產品全面爆升。不過，升勢好快降溫，昨日個市無力，相信係同阿爺驚個市升得太快太急，自淋冷水有關。
官媒︰降準不是股市興奮劑
阿爺咁快放水有啲出乎市場意料，準確啲講，中央扭大水喉係遲早嘅事，但市場無估到係咁快會郁手，由此估計內地經濟增長減速明顯比估計嚴重，令阿爺逼住提前動手。提早入市，本來應該為市場帶來驚喜，但內地股市昨日初段上升後，無以為繼，跟手仲由升轉跌，相當反高潮，呢個反應估計同中央同一時間出口術甚至手術，明言唔想股市樓市爆升有關。
在降準同時，《人民日報》昨日登出了一篇名為「降準非股市興奮劑 樓市不會明顯扭轉」http://hdfin.stheadline.com/inews_headline_list.php嘅文章。呢篇文章好明顯有係有備而來，解釋咗今次降準原因、作用，同時對樓市股市的影響。據文章解釋，中央今次降準主要是因應人幣匯價轉弱，外來資金流入減少影響流動性，以及應對通縮威脅，但中央對貨幣政策沒有轉向，亦即是沒有重大刺激措施出台。但專家在文章中亦估計，未來降準機會仍在，利息還有下調一次的空間，但連續減息的機會就有限嘞。
文章仲連A股ETF的反應都留意到，話消息公佈後相關工具急升了7%，但同時提醒市場，內地下個星期有大量新股上市，認為措施最多令市場離開向下突破的危險區，又話從經驗顯示，降準和股市上升的關連系數不大。樓市方面，估計降準會改善市場的資金面，但對樓價的方向則不會有扭轉作用。
從《人民日報》呢篇咁細緻的分析，可見中央係想透過放水，加快提振實體經濟，同時又驚資產市場膨脹太快。畢竟，阿爺唔想放水谷起樓市、股市，但無錢走去實體經濟，喺咁矛盾情況下，就出現食完補藥急淋冷水的狀況。除出口術，唔排除阿爺會訓誡大基金大證券行唔好亂來。
內地房託創一年新高
由於內地經濟麻麻，資金湧向收益穩定的中移動(941) ，股價再創52周高位，高見108.5元，全日升2.6%，造108.3元，成為港股主要升市功臣，為恒指貢獻50點。油價升勢斷纜，結束連升四日的走勢，隔夜美國期油大跌9%，扭轉航空股近日頹勢。國航(753) 升4%，造6.99元，為表現最佳國企指數成份股。
由於貨幣政策有動作，一眾中資金融股點都會受惠。加碼放水同樣利好一眾內房股。華潤置地(1109) 獲野村升目標價，股價揚3.5%，跑贏一眾藍籌。雖然官報話降準唔會改變樓價方向，但貨幣政策未來仍然趨向寬鬆下，龍頭內房股低吸仍有吸引力。至於收益穩定的內房信託好似越秀房託(405) 昨日就創咗新高。
傳內地將降火電電價，一眾內地電力股逆市捱沽。野村料降電價對華能(902) 及華電(1071) 影響最大，華能瀉10%，造9.63元；華電跌幅相若，華潤電力(836) 挫6%，為包尾藍籌股。
陸羽仁
金融High Tea 舊文