中環在線：嘆開業14年 租金三級跳
黃雙如小店下周結業
■黃雙如嘅「有食緣」入面嘅花膠牆，近半空空如也。 鍾偉德攝 
香港著名建築商鄧鏡波嘅外孫女黃雙如熱愛下廚，對材料精挑細選，煮荷葉飯都要用上法國鵝油與西班牙老樹橄欖油。寫食譜之外，佢2001年喺中環開設高級雜貨店「有食緣」，儲落唔少識飲識食嘅熟客，可惜時移世易，佢慨嘆𠵱家顧客唔似上一代咁買嘢，加上成本上升，決定本月底結業。
黃雙如噚日下午留喺店內招呼熟客，難掩離愁別緒，佢坦言「好難過，心情好唔好。最唔捨得係班員工、一班熟客同呢個地方」。
■唔少熟客得悉有食緣快結業，專誠趕來入貨。 
■有食緣開業十多年，售貨員同一班熟客已成為老友。 
■黃雙如對食材精挑細選。 資料圖片 有食緣儲落兩代熟客
有食緣喺2001年初開業，14年間搬過兩次舖，黃雙如感慨話：「由陸佑行到皇後戲院，再嚟到砵甸乍街，租金三級跳。」
最弊係大家嘅消費模式改變，「𠵱家顧客唔似上一代咁（買嘢），變得好快」佢透露，上月生意只得原本三成，「咁人工升、成本同租金又升，生意跌得好快」。考慮過多方面之後，佢惟有選擇結業，下周一最後一天營業。
有食緣結業後，黃雙如仍有好多善後工作要做，所以佢暫時冇乜計劃，亦冇諗去旅行散心。至於會否再戰江湖？佢有少少意興闌珊咁話「唔知，真係唔知」。
黃雙如呢間雜貨店確係儲落唔少人情味，華華噚日親眼見到一位廿多歲嘅女顧客走入舖頭，流住眼淚跟每位店員道別，原來佢媽媽係呢度熟客，成班店員睇住佢長大，好有感情。
唔少熟客知道有食緣結業亦紛紛趕至掃貨，店內最搶眼嘅花膠牆，一隻隻成塊面咁大嘅花膠，每塊6,000元至過萬元，有一半已經俾人買走。另外兩個冰櫃幾乎都清空，貨架堆滿十幾包大大細細嘅袋，就係熟客嘅留貨，難怪所有店員都話做到冇停手。
■恒生新抱 何倍倩 【顧客心聲】
何倍倩心血來潮時會按照黃雙如嘅食譜，去有食緣買材料煮餸，佢最記得係用一款西班牙Chorizo腸煎帶子，刁鑽得來好美味。佢又鍾意有食緣嘅花膠，貪其又靚又厚身，可以做花膠扒。
■熟客張小姐 張小姐本身鍾意下廚，佢指「呢度買嘢都經過精選，唔似超市一批批咁賣，會有信心啲。好似連一樽腐乳，都係揀過最好先賣。」佢多數喺有食緣買調味料，好似紅香粉，噚日仲獲送一樽黑蒜粉。佢打算月底結業前再去入貨。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文