陸羽仁 BLOG 2015年3月26日
股神做嘢
2015/03/26 08:51:21
網誌分類: 經濟
美股大插1.6%，杜指跌292點。美國2月耐用品訂單遠差過市場預期，令市場擔心美國第一季GDP增長比較疲弱。另外，美企業績公布潮即將開波，投資者又憂慮美企盈利在強美元的持續衝擊下，首季盈利會好肉酸，大市沽壓嚴重。
德國商業景氣指數利好，加上美國數據差，抬起歐元推低美元，歐元升0.4%，黃金和油價都急彈，黃金升上2周半高位，期金升0.5%到1197美元。油價仲顛，弱美元加上產油國也門的衝突，令油價大升3.6%，升到49.2美元。
美股第三日向下，而且愈跌愈傷。杜指跌292點，收報17719點，跌幅1.6%；標普500指數跌30點，收報2061點，跌幅1.5%；納指受生物及科技股急瀉4%拖累，大跌2.4%。
相比中細型股票，藍籌股近期沽壓比較嚴重，羅素2000隻中小型股指昨日收市1234點，全年仍有2.5%進賬，而杜指及標普500指數已經見紅，分別跌了104點及2點。主要原因係隨著美企業績公布潮將於4月展開，而市場覺得美企首季業績會比預期為差，上個季度，許多美企已經埋怨美元持續強勢，令到盈利表現受損，而美元匯價升勢一直未停止，不少美企已經將今年首季盈利預期調到很低，甚至負值。
據湯臣露透的資料顯示，今季度預報業績差過市場預期的公司數量超過好過市場預期的公司數量5倍。有見及此，好多基金經理都先行調整倉位，將近期升得比較多的藍籌股沽出，鎖定利潤。
另外美國2月耐用品訂單較上月下降1.4%，遠差過市預期的增長0.1%，而且四個月內第三次下。剔除比較波動的交通運輸工具以後，仍然下降0.4%，更是連續第五個月下收縮。另外，美國商務部將1月份的耐用品訂單數據從此前的增長2.8%向下修正至增長2%。分析解釋，耐用品訂單收縮，除了環球經濟放慢，需求減少外，強美元進一步削弱美國貨的競爭力。
有紐約分析師話，大市昨日顯著下滑，其中一個理由係投資者見到美國10年期債息昨日出現兩個上升浪，一個朝早，一個中午。不過，佢認為投資者無需對昨日大市嘅弱雞表現過份擔心。因為如果將鏡頭拉闊一點，例如今年，美股各個板塊以至債市美匯，就會見到唔算低，亦唔算高，其實只係處於中間位置。
例如昨日跌最慘烈嘅係太陽能股、生化股及半導體股，但以季度計，上述三個板塊卻係升得比較多嘅；再睇今年跌得好慘的石油股、鋼鐵股，昨日卻係表現最好的。睇標普500指數，今年最低大約2000點，最高大約2117點，昨日收2061點，都係處於中間位置，至於油價呢？昨日徘徊於每桶49美元，亦都係高位54美元及低位元43美元的中間價；即使係昨日嚇到投資者腳軟嘅美國10年期債息率1.9厘，其實都係處於最高2.2厘及1.6厘嘅中間位置而已。結論係唔使太驚。
有人對大市無信心，但股神巴菲特卻再出大招，投資100億美元，將旗下嘅亨氏同卡夫食品合併，創建卡夫亨氏公司。巴菲特持有51%，而卡夫現股東將持有新公司49%的股份。合併後，卡夫亨氏將成為北美地區第三大、世界第五大食品和飲料公司。股神做嘢，都唔係睇淡後市的表現啦。
陸羽仁
回應(1) 我想回應
陸羽仁 BLOG 舊文