異動空間：慳水慳力炒股法
漢能薄膜發電（566）升到街知巷聞，本地報章多以市值做焦點，先超越港交所（388），再過埋長和（001），但究竟呢隻股點炒？點先賺到佢錢？《金融時報》以專題報道其爆升秘密，研究科學化值得一讀。
報道以2013年1月至2015年2月，漢能股價走勢作研究，假設散戶炒即日鮮，每日開市價買漢能，持有至3點半沽出，竟然要輸三成有多，1,000蚊輸剩635蚊。相反3點半先買，以當日收市價沽出，用1,000蚊炒半粒鐘，埋單袋8,430蚊（7倍回報）。在研究的25個月中，用半粒鐘炒法有23個月可賺錢。
事實上，莊家炒股好多時都係午後先開車，以昨日最大升幅的鼎和礦業（705）為例，最尾一粒鐘由0.195炒上0.275元，升幅四成，原因好簡單，尾市先爆上，莊家慳水又慳力，不用全日頂住個價。專炒細價股的戰友，不妨試嚇午後先開工，回報應較炒足全日為高。
推介方面，可留意績優股威勝集團（3393），核心純利升28%，大行普遍預測今明兩年仍有近兩成增長，可中長線持有，目標先睇11蚊。
魏力
http://www.facebook.com/2012jason
魏力
異動空間 - 魏力 舊文