中環在線：周凱旋拍檔現身
張培薇幫維港投資管數
■周凱旋（左圖）同張培薇喺1992年一齊創立維港公司。
「超人」李嘉誠私人名義嘅維港投資（Horizons Ventures）投資高科技眼光準就出曬名，原來負責打理呢間公司嘅，除咗有佢紅顏知己周凱旋（Solina）之外，仲有一位低調嘅創辦人，佢就係Solina嘅好姊妹張培薇（Debbie）。噚日Debbie首度開腔會見傳媒，指自己喺維港投資係「好重要角色」。
一講到維港投資嘅項目，Debbie忍唔住賣花讚花香話「犀利」，佢讚Solina與維港投資團隊好眼光，而佢自己就比較少親自挑選項目，主要負責處理維港投資嘅公司財務、內部事務等等。佢最鍾意嘅高科技「玩具」，就係可穿戴裝置Misfit，話可以用嚟紀錄運動、遊水、散步嘅習慣，好有用咁話。
前特首董建華表妹
Debbie另一個身份係前特首董建華嘅表妹，亦因呢個身份同Solina結緣。兩人喺上世紀八十年代透過資深傳媒人施南生介紹而互相認識，之後喺1992年共同創立維港公司。
Debbie與Solina當年幫董家跟長實合作嘅北京東方廣場做顧問，Solina就因為呢個項目而跟超人結緣。照咁睇，Debbie可以話係超人與Solina兩人嘅「媒人婆」㖭。
低調嘅Debbie一直好支持維港投資嘅活動，舊年喺上海嘅巡迴展覽亦有出席，不過當時佢冇跟傳媒交流，只係坐喺台下睇創新公司嘅演講。噚日佢就同藝人葉蒨文一齊去惜食堂做義工，同一班長者食飯傾偈，仲話遲啲要帶埋Solina一齊嚟做義工。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文