一周三件：儀征改名等落鑊
■儀征化纖改名為石化油服，食正北水南調頭啖湯，追炒落後H股，值博率高。 互聯網
阿爺啱啱公佈放寬滬港通資金來港準則，北水更加自由行，炒AH股折讓，肯定係其中一個主題。喺滬港通當中，前稱儀征化纖嘅石化油服（1033），係港股通AH股中折讓最大，H股呢邊翻一番，折讓仲係大到離曬譜嗰隻。
炒H股折讓水位足
阿爺啱啱公佈，祖國公募基金投資港股，無需要先有QDII嘅資格，變相放寬規限而全面放水。據估計，祖國公募基金資產規模，到今個月尾，會突破5萬億元人仔。諗到嘅係，阿爺開放開通投資港股政策，北水來勢勁澎湃，已納入滬港通嘅股份，會正食頭啖湯，AH股折讓大嘅個股，更加有炒賣價值，噚日中國中冶（1618）追A股折讓，單日就升咗20%！
石化油服A股，由去年9月中宣佈重大資產重組，復牌以嚟，一路升，家陣累升咗兩倍，新報9.05元人仔，折約11.3港元，而香江H股股價，得3.49元，比A股大折讓近70%，亦係滬港通同上海AH股之間，折讓最大！
不妨計計數，假定北水沽A股買H股，又好誇張當A股跌一半，到5.6港元，香港H股都要升65%，先追到A股股價。又石化油服A股噚日隆而重之停牌一日，除咗因為改名外，亦因為撤銷「ST」退市風險警示。集團上年俾阿媽眷顧，換走大出血化纖瓣數，再注入油服項目，由2013年度見紅14.5億元人仔，轉為上年度盈利24.2億元人仔。有番靚仔業績嘅支持，斷估A股呢邊股價持續穩定，而在新北水措施下，更大有條件追炒香江呢邊落後嘅H股。
石化油服翻一番到6.8元計，比A股仲要折讓近40%。再保守啲，當石化油服追齊行家海油服務（2883）AH股55%折讓水位，都講緊要翻半番，到5.1元價位。
錢雋
細價股專家
本欄逢周二、三、五刊出
錢雋
一周三件 - 錢雋 舊文