異動空間：北水鍾意點揀股
大時代式升市一樣會震倉，篩走唔夠堅定的散戶。魏力暫時判斷係：上周係前奏，本周才開始發力，主力正規軍仲未殺到，甭擔心！每次遇上約一千點震倉都可撈貨，鎖定三大主題（互聯網+、一帶一路、大折讓H股）即可。
話明北水湧港，定要明解放軍點揀股。魏力早幾日跟一名資深內地經紀吹水，重點如下：大陸人炒股睇圖，鍾意揀突破橫行區股票，成交突暴升更佳，代表主力（基金大戶）來了，屬非跟不可的訊號，之後就會連棍爆上，例子：科通芯城（400）、城建設計（1599）、綠色動力（1330）。
今日推介的中國光纖（3777），食正互聯網+概念，圖表完美突破四個月橫行區；成交量暴漲，剛創去年8月配股上板以來最大成交，代表猛人在掃貨了，隨時成為上述三者翻版！中國光纖去年盈利爆燈，下半年賺2.66億人仔，較上半年飆升67%，今年適逢光纖鋪網大年，去年12月，集團與中電信集團簽約，合作建設及營運光纖到戶寬帶網絡基礎設施，對提升收入大有助益。十送二紅股將於7月除淨，屬大升催化劑！
魏力
http://www.facebook.com/2012jason
魏力
異動空間 - 魏力 舊文