壞當好炒
2015/04/10 08:55:25
網誌分類: 經濟
美股呆呆哋，中港股市，特別係港股就發曬癲！上證綜指昨日朝早抽穿4000點至4014點就掉頭回落，之後在3950點橫行。港股恆指繼上日勁抽近千點，昨日變本加厲，朝早抽上27922點，較上日飆升近1700點，但唔夠一粒鐘又大插1200點至26732點。港股話就話受大陸股市帶動，昨日又跟唔得曬，衝上高位後跟住大陸股回軟，但收市仍有707點進賬，大升2.7%！金管局昨日開始入市接31億美元沽盤，港元貼近7.75強迫保證，資金繼續流入，顯示港股在大水湧到時，唔理內地回吐自己繼續炒。
大市風高浪急，轉身唔夠快，隨時輸身家。據聞有唔少散戶因為銀行電話太忙落唔到盤，要跑到銀行櫃位買貨，搞到銀行場面噓冚。買股票要用電話咁滯後，可想而知係老散到唔老散啦。
內地股市昨日回調，相信原因之一係近來升得太急勁，係時候唞唞，我覺得一個更值得留意的原因係市場對於中國經濟疲弱呢個事實，開始有點戒心。昨日有不少報導，不少大行都在預測中國今年一季度國內生產總值(GDP)同比增速將放緩至7%，睇得比較好的是上海證券及高盛，預期增長有7.2%，睇得最差的是華僑銀行，預期增長只有6.9%，無論如何，在7%以下，將是2009年第一季以來的最低增速。
通脹方面，隨春節過後食品價格有較大幅度回落，估計3月CPI較去年同期只增長1.3%，而3月PPI較去年下跌4.8%。資料顯示黑色金屬連續第四個月下跌，不過跌幅略有收窄，能源和橡膠價格回落，化工產品小幅上漲。能源方面，天然氣和汽油價格反彈，但煤炭價格繼續下跌，且跌幅較2月擴大。所以，煤炭相關股雖然大炒落後，其實生意未掂。例如中煤能源(1898)
2月份商品煤產量按年跌37%，銷量跌35%；今年首兩個月累計產量較去年跌34%，銷量跌25%。但股價卻隨大市大幅由3月中的3.84元狂炒至昨日的5.28元，狂升近四成！反映市場正在「亂炒落後」之中！固然，這種市道，唔使講理由，不過，要小心嘅係，呢類股票，回起上嚟，亦唔係人咁品！ 阿爺雖然推出托底政策，自去年11月以來，貨幣政策持續寬鬆，財政支出力度也明顯加大，但經濟弱勢暫時未改，國內工業生產改善不明顯，同時房地產建設活動持續滑坡，由於直到3月底，經濟增速下滑的勢頭仍然不減。光大證券預計，中國二季度GDP增長「破7」的可能性很大，因此，估計阿爺會繼續推出更多托底經濟增長政策，並且以「寬財政」及「寬信貸」為主。
瑞銀指出，3月電廠煤耗和粗鋼產量以至中國經濟活動都無起色，主要受疲弱的房地產活動所拖累，繼1、2月房地產銷售面積同比下跌16%，新開工面積同比大跌18%之後，3月房地產銷售仍未見有明顯改善。隨著房地產下行給經濟帶來越來越大的拖累，後續增長勢頭可能再度惡化。瑞銀並維持全年GDP增速從7.4%放緩至6.8%，在2016年放緩至6.5%的預測。
阿爺已經知衰，近期手口並用，為內地樓市「打氣」，繼央行上月宣佈下調二套自住房商貸首付比例至四成以後，昨日上海市公積金管理中心宣佈由4月15日起，上調購買首套房及二套普通住宅最高貸款額度，個人最高貸款額度由30萬元調整至50萬元人民幣，家庭由60萬元調整至100萬元。目的係鼓勵更多上海市民買樓。中國經濟下行壓力愈來愈大，政府惟有鬆綁樓市啦。這又是一個壞消息當好消息故事，在美國、日本、歐洲上演過，如今搬中到中國上演，經濟愈差，阿爺愈要放水，中港股市中線仍可睇好。
美股方面，美國鋁業週三收市後公佈業績，拉開美企業績公佈潮序幕。美鋁第一財季營收58.2億美元，較上年同期增長近7%，差過市場預期的59.4億美元，而盈利每股28美仙，則略高過預期2仙。市場原本預期美企受到低油價及強美元衝擊，盈利會好唔掂，而打頭陣嘅美鋁成績麻麻，加強咗市場對美企業績疲弱的憂慮，美股早段股軟，午後紐約油價回升1.5%，能源股造好，推動美股反彈，收市由跌轉升，杜指升56點，收報17959點；標普500指數升9點，收市報2091點；納指漲23點至4974點。
美國經濟，特別係就業數據唔得，市場對聯儲局提早加息的預期大幅降溫，投資者的注意力將轉移到美企業績表現上，亦將成為左右大市的主要力量。據Rockwell Global Capital首席經濟師Peter Cardillo估計，盈利好過預期，但營收唔掂，將成為美企季度業績的典型，主要係拜不斷向上的美元匯價所賜，特別是那些以出口生意為主的企業。
陸羽仁
回應(7) 我想回應
陸羽仁 BLOG 舊文