金手指：邊個輸到除褲
■上周股市至爆新聞，必定係漢能薄膜跳水直插事件。 互聯網
上周股市至爆必定係漢能薄膜（566）跳水直插事件。漢能就係做佢哋聲稱史上最強太陽能嘅嘢。唔好話呢間我連太陽能板塊都唔多理，因我唔信一啲要補貼先能生存嘅工業。睇到呢到你可能會問，咁你又講漢能？係咪想做財經版
嘅「吸濕大笨象」，有孫柏文冇風濕咁抽水？其實，今日講漢能嘅原因係因喺5月6日，前輩周顯兄喺本報專欄講我同呢間公司。周顯兄同我喺一份財經雜誌參加一個投資比賽。
風大垃圾都吹得起
但喺嗰個投資比賽眾參賽者中得一個人，即我，有拋空股票，仲要我拋空嗰隻就係漢能。你可能話，都唔識太陽能點拋空呀？講真，我第一次留意漢能，係喺《蘋果》即時新聞睇到話漢能市值超越三千億元。一睇，嘩咩料呀？佢做乜可以市值直逼長和（001）呀？根據周顯兄話，原來除咗我之外，好多大鱷都拋空呢隻股票，仲要有好多外國實力傳媒踢爆過佢啲衰嘢。但周顯兄話我哋呢啲人全部都會「輸到褲都要除埋」。周顯兄篇文出街前嗰日漢能收7.36元，一路橫行，跟住就上周一嘢跌穿4蚊停牌。我呢啲咁鍾意認屎認屁嘅人，梗係即時瘋狂周圍喺facebook、友報等，係咁抽周顯兄嘅水，問：「今次邊個要除褲？」不過經過幾日來嘅沉思，我今日要為周顯兄平反。
睇佢篇文，佢從冇話過漢能啲產品好堅，連啲數都冇話ok。純粹係因市場對該公司股票嘅供求關係，有如青姐胡孟青金句，風大起來，垃圾都吹得起。我只係覺得，佢市值最大時，唔通真係再倍升咩，升多四倍，就同美帝通用電器GE睇齊。我就賭佢升唔到嗰個位，故用四之分一嘅錢拋空，而佢最後因冇力印鈔買貨而股價爆破。論值博率，拋空係好難。聽藺常念藺大師話，有對沖基金喺兩蚊樓下已拋空，就當佢未平倉，插水跌落來後嘅三個幾股價，都係蝕到飛起。有如周顯兄話齋，都仲係「輸到褲除埋」。6蚊先拋空嘅我，係純粹好彩。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文