金融High Tea 2015年5月14日
市跌炒股升
2015年05月14日
五窮六絕，唔單止香港係咁，美股雖然喺今個月創咗新高，但債市今個星期出現大幅波動，令股市受到影響，令人關注全球資金流向，連內地都喺高位唞氣唔再上，香港大股自然繼續尋底。
雖然市場估計美國六月唔會加息，九月加唔加就一半半，但由於就業數據強勁，令人相
信美國雖然個別數據唔好，都只屬個別現象，整體狀況仍然唔錯，所以加息預期呢排開始升溫，美國債息一度回升，債價隨之腳軟，搞出個小債災。由於資金流向唔明朗，市場擔心美股都受影響，令杜指呈現高位整固，表現反覆。
外資玩大 內資玩細
呢個情況放咗落香港，就出現外資對市況比較睇淡，同時有資金需求的公司就紛紛出手集資。今年港股基本形勢係內資睇好、外資睇淡，當內資多時就市況向好，內資減慢就到外資主導情緒，5月份外資多數偏向少做少錯。至於內地資金經過4月份私募基金搶閘湧落嚟買股後，5月有少少收晒火，睇昨日成交1464億，都唔可以話內資走好多來港。
不過昨日亦有個現象，係紅色大股唔升，但唔少炒味濃的中型股都炒番上，至少有較似樣的反彈。例如科網股成個板塊係咁炒，隻網龍(777) 一口氣飆升20.8%，收33.9元，佢都唔係太細隻，有169億市值，都炒都咁誇，軟件股金蝶(268) 升6.3%，佢哋都創緊近來新高。另外有小米老闆雷軍概念的金山軟件(3888) 急升9%，暢捷通(1588) 亦升7.8%，佢哋就狠狠反彈。另外隻阿里影業(1060) 衰咗一排亦生猛番，昨日大升13%。
呢個大市跌，但有概念的炒股續升的現象，可以理解為市底仍強，炒作資金不甘寂寞，停唔到手，唞一唞就出手；也可以話外資玩大場，內資呢排即使唔主導大場，亦劃番個細場出來玩嘢。
內地午後公佈多項經濟數據，4月份實體經濟數據持續疲弱。工業增加值4月份同比增長5.9%，高於上個月的5.6%。發電量同比上升1%，高於上個月的－3.7%。不過，1至4月固定資產投資顯著放緩，同比僅增長12.0%，低於第一季度的13.5%。首四月房地產交易成交量同比下跌3.1%，跌幅較上個月的跌9.3%收窄，意味早前房地產市場的放鬆政策取得初步成效。
研究機構澳新認為，4月份內地的實體經濟數據顯示，第二季度首月經濟增長可能低於7%，預料政府將進一步推出穩增長措施。貨幣政策方面，央行料在第二季度將下調貸款利率0.25厘，以此降低企業融資成本。央行未來是否降準將取決於資本外流、市場流動性、以及內地股市的估值。
港交所騰訊業績受踩
由於數據欠佳，上證指數升勢不保，港股亦由升轉跌，恒指昨收報27249點，跌157點；國企指數收報13859點，跌113點，成交1442億元。藍籌股普遍向下。港交所(388) 首季多賺34%，收跌5.2元，報278.8元。摩根大通發表報告踩一腳，認為港交所首季盈利較該行原本預期低4%，亦低於市場預期9%，主要因交易費及交易系統使用費收入未達標，部分是南北向交易影響，抵銷較佳的成本控制。該行仲話，港股成交或已於4月初見頂，料夏天交投會呈季節性回落，市場或下調對港交所的預測，佢嘅語氣係一貫外資看淡的本色。
另外騰訊(700) 全日微跌0.13%，收報156.8元。公司收市後宣佈季度業績，季度純利68.83億元人民幣，按年增長6.6%，按季增長約17%，差過市場平均預期的70.65億元。睇嚟騰訊股價有少少壓力。
陸羽仁
金融High Tea 舊文