一周三件：珀麗博翻一番
■珀麗酒店是超級現金牛，仍伸手配股集資，令市場憧憬會有大製作跟尾。 資料圖片
珀麗酒店（1189）喺呢期配股股份當中，罕有的「加價」。無他，就算計算呢板配股攤薄，珀麗每股淨現金等值兩蚊，單係望住呢個目標邁進，珀麗都講緊幾乎要翻一番！
配股集資或有後著
珀麗呢期配
股，原先嘅計劃係以每股0.8元配售，但後尾更新補充，將配股價調高11%到0.89元，而承配人一樣受落。珀麗上年尾淨現金10.13億元，同期仲有一批借畀德祥地產（199）貸款票據4.35億元。後邊嘅德祥地產，早幾年喺澳門物業銷售，預售過百億元，兼等入賬。
按目前財務情況嚟睇，珀麗好safe之餘，計埋呢板票據計，集團淨現金等值，係挨近15億元。又連埋呢期配股淨額1.14億元，同股份攤薄計數，珀麗每股淨現金，高達2.04元，係現價（1.13元）嘅1.8倍！承配人以呢個配股價hold住兩蚊淨現金，制唔制？
又睇番呢期場內話配股/計劃配股嘅股份情況，中國綠島（2023）4月尾話配股，家陣創咗三年高位，比配股價大升咗110%。又泰淩醫藥（1011）同樣係一支箭創咗三年新高，比配股價1.86元高出56%；漢傳媒（491）頂位作勢爆邊上，昨收1.25元，比配股價0.81元高出54%。
家陣港股正處超級大時代，細市值股仔炒到火紅火綠，谷大需求，就算配股承配人沽貨，配股貨源都易消化；又承配人若果借貨，街貨無多到，股價更易一支箭咁升，形成家陣配股供股無有怕，一直到炒爆場面出現為止。
珀麗係超級現金牛底，有足夠營運資金，呢期都伸手配股集資，唔可以唔諗係咪有大製作跟尾？排除呢個可能，乘住呢期炒配股熱，珀麗有機會有一番作為。好似上邊計珀麗上番每股淨現金兩蚊，要升80%，到時PB仲係得0.66倍，值博率高。
錢雋
細價股專家
本欄逢周一、三、五刊出
錢雋
一周三件 - 錢雋 舊文