金融High Tea 2015年6月3日
帖文效應
2015年06月03日
人民銀行傳出向特定內地銀行以抵押補充貸款操作方式(PSL)救市，再令滬深股市急升，上證綜指升1.7%至4910點，無奈港股懶理A股走勢，全日反覆下跌，收市回吐130點。
除了政策消息，有段股市花邊引起陸羽仁注意，報道話最近內地有個經常在網上發帖評論
港股的「金手指」，懷疑係香港的投資持牌人，佢點評的股份近日接連急升，狀況已經引起證監注意。可能是受這則消息影響，金手指品題過的股仔呢兩日都靜咗少少。
大媽羊群來勢洶洶
香港股評人數目繁多，佢哋眼光無論好壞，點都同市況有些關連，正如陸羽仁口頭禪，個市錢多雞犬皆升時，掟飛鏢揀股可能最準，你講理性就輸啦，所以名嘴喺魚缸邊指點江山，資深股民最多係當參考，無人會信到十足。不過，內地股民炒股就唔同，佢哋興集體行動，有人形容呢個做法係羊群，但大陸人多，就算係羊群猛衝，數目太多就連巨熊都會被佢撞死，所以有人發號施令，羊群效應都可以造成短暫得來又好勁的殺傷力，財演威力過咗深圳河又會唔同晒。
好似內地呢類炒股帖文，評點港股，引發內地資金湧入，造成市值細小的公司爆升絕不為奇。相同情況喺幾年前大陸樓市最瘋狂時都出現過，當時好多溫州炒樓團穿州過省，四周炒作，一處一處咁撩高樓價，掀起圈圈樓泡。
嚴格而言，呢類「金手指」點石成金，如果只是推介，無造市無在背後「搭棚」，只是口術造成資金湧入的效應，咁同大行喺度唱好無好大分別。相反，如果有人互相配合，互相交波，咁當然就要小心地雷啦。
依家股仔禾雀亂飛，有股份一日瘋狂爆上，搶盡眼球，有股份陰陰上升，驚你睇到。部份係賣盤有搞作，部份係借勢炒作，有做開「大刁」的本地投行話，依家市場資金確係多，咁嘅環境小股民投機博懵買少少無妨，但想瞓身之前就要諗清諗楚先！
講開爆升股，周初因馬雲入股復牌後急升的瑞東(376) ，一向低調的集團主席、股壇猛人高振順在股東會後好罕有咁講個交易，聲稱自己持有的股份仍有18個月鎖定期，因此，相信仍留任一段時間。佢仲話，在新股東入主前，他與馬雲並沒有溝通，亦不認識對方。
有記者就問佢對方「無啦啦」點解入股，高老闆就話相信新股東是經慎重考慮才入股，透露新股東與瑞東集團的未來合作方向，會以香港為主，認為香港是一個良好平台，讓中國資本走出去，認為互聯網金融是發展的一大趨勢。隻股前日大升後略回，收22元，微跌2.2%，後市就要看他們如何亮劍搞作了。
核電股先回後穩
內地有新股熱，中國核電等11隻新股昨日開始申請認購，大量資金流向「打新」，市場預計IPO凍結資金將創新高，但市傳人行近期針對特定銀行進行了1.5萬億元人民幣抵押補充貸款(PSL)操作，上證指數先跌後回穩，全日升逾1%，收復4900關。核電股喺A股繼續炒作，在港掛牌的核電股回一回後，尾市都企穩番。
本港藍籌昨日就乏善足陳，幾隻大股中，港交所(388) 300元關口點都有阻力，升完一日又回番跌5.2元，造296.8元；被投行美銀美林降級的利豐(494) 股價沽壓大，插5.9%，成為包尾藍籌股，仲有匯控(005) 傳公佈裁員計劃，股價依然無得升，收市跌0.3元，造73.55元，收市後外電報道匯控被法國司法當局要求在6月20日之前繳納10億歐羅保證金，為支付可能的罰款做準備。
傳統藍籌無力，國企跟唔上內地，恒生指數收造27466點，跌130點；國企指數收報14201點，跌97點，成交金額1465億元。
陸羽仁
金融High Tea 舊文