金融High Tea 2015年6月11日
運低打倒褪
2015年06月11日
港股呢排好有人衰行路打倒褪的味道，一早開市傳來A股未能納入MSCI指數的消息，搞到市況弱弱哋，下午再中多一棍，傳出有曾經遊韓港人發燒的新沙士疑似個案，個市即刻掉咗落嚟，疫症可大可小，就算個案未證實，都已經令到個市損失幾百億市值。
A股入MSCI
指數的消息炒作多時，最近已經開始退熱，市場基本上預計今次不能成功。?家出來話大摩會同中國當局協調，基本上符合咗先前估計，「入摩」失敗市場反應唔係咁大。
入摩不成 爆疫驚魂
對於呢次未能「入摩」，港交所(388) 行政總裁李小加(見圖)認為，有兩大因素會影響A股納入指數，一是深港通的開通，二是透過取消現時的滬港通或是未來的深港通每日額度限制。在開放A股市場的問題上，需要多方協調，他相信中央是不想推進的速度過快。
中銀香港(2388) 高級經濟研究員蔡永雄認為，基於海外投資者在內地持股仍不可超過三成，日後即使MSCI將A股納入新興市場指數時，僅會計算A股市值約5%為起點，令A股在相關指數中佔比約1.3%，按現時追蹤這指數的資產約1.7萬億美元計，一旦A股獲納入指數，料會有約210億美元資金進入內地市場。由於總量不大，對內地金融市場是意義大於實質。無論點講都好，?家入摩未能成事，呢個題材相信會暫時淡退。
反而另一個仲發展緊嘅係新沙士，有中環茶友話，一名從南韓回來的女士發燒，已經搞到個市唔見二百幾點，可見傳染病殺傷力幾大。旅遊股即時急挫，專業旅遊(1235) 收報0.97元，跌近8%，專做日本團的東瀛遊(6882) 都跌3.8%，下個月就係旅遊旺季，南韓被新沙士搞到一鑊泡，跟住仲流傳有其他疑似個案，?家消息仲未完全消化，呢類股份相信仲會好波動。
牌面睇，下周政改表決及聯儲局議息，再借新沙士疑似個案推低大市，恒生指數最多跌416點，低見26573點，尾市喘穩，仍要跌三百點收市。恒生指數收造26687點，挫301點；國企指數收報13616點，挫245點，成交縮減至1441億元。
個別股份方面，中國核電首日在上海掛牌，開市後僅數秒即升停板，對手中廣核電力(1816) 卻被大行唱淡，全日急跌兼失守5元大關，收造4.7元，跌成11%，跑輸一眾國企指數成份股，係典型好消息出貨，外資喺4元水平之上已唱淡隻股，俾佢舞上5.53元掛牌後新高當然好唔順氣，?家聯手散貨插低佢，估計短期好可能要唞唞氣。炒呢類急升股唔可以等最後一個好消息先食胡，再多一個例證。
大昌微線金蟬脫殼
跌市中傳出中信系將進一步重組，刺激個別中信系股份急升。中信資源(1205) 爆升30%，報2.34元；中信大錳(1091) 急揚13.8%，造1.32元；中信國際電訊(1883) 飆7%，呢類重組消息通常係炒大唔炒細，但如果見急升高追，就要小心佢突然回頭，最好都係等跌番先至考慮。
大昌微線(567) 股價爆升，主席兼行政總裁陳錫明及其家屬持有信託基金Earnwell(PTC)，轉讓25%股權予獨立第三方張靈敏，但未有披露作價，股價一度爆升逾四成，收市報1.35元。隻股市值急升後都係6億幾，由於佢急升咁多，引發獲利回吐。大昌微線做開線路板，個殼幾乾淨，而且現在只係賣兩成，唔排除佢仲會有後着。
陸羽仁
金融High Tea 舊文