金融High Tea 2015年6月4日
長實地產威晒
2015年06月04日
國際足協選舉前，歐美國家展開一場「黎明進擊」，喺選舉前由瑞士郁手拉人封艇，拘捕多名涉嫌貪污的高層，此舉被視為配合歐洲要拉倒國際足協會長白禮達的重要部署，結果白禮達在拉非國家支持下仍然當選，但英國等歐洲足球大國誓不罷休，聲言要杯葛在俄羅斯舉行的世界盃
，美國同時暗示調查會牽涉白禮達，在連番角力下，白禮達終於頂唔順宣佈請辭，美歐民眾大呼革命成功，俄國人就質疑呢次係美國佬整蠱佢哋，令人諗番起三十幾年前西方杯葛莫斯科奧運會。
一隻股撐起個市
中環茶友唔少係球迷，但佢哋講呢啲唔止係球迷之見，有茶友話，足球有巨大商業利益，歐美當然想自己操控，白禮達靠「新興市場」自重，終於被人拉咗落馬。同一個道理，都可以用嚟睇中國A股入大摩MSCI指數應該點玩。
內地想中港南、北水互調，要靠中港股市互聯互通；若想東西水流動，一個方法係把A股納入大摩MSCI指數，因為好多基金都係根據大摩呢個指數的比重去配置股份，如果A股入選，就有誘導這些資金流入內地，所以最近幾個月內地股市炒作呢個概念之餘，同時見到財金官員好努力咁做工夫。
大摩MSCI涉及海量資金的流向，美資大行有無咁順攤幫手呢？呢個問題相當複雜，涉及好多利益考慮同交換。簡單啲講，將A股納入指數，等如畀錢內地使，咁樣一問大家都知無咁易啦，所以內地雖然努力緊，但好多分析都估六月檢討成事機會只係一半半。
?家內地金融改革，牽涉最大議題係市場開放，其中包括人民幣自由兌換同A股對外資開放，人民幣會否納入美國貨幣基金(IMF)係其中一瓣，預期今年內或者有突破。至於股市開放雖然做緊，但外資要搵着數，似乎?家都仲未有好大甜頭。早幾日英國富時指數公司搶先話放A股漸進納入，甚有英國細佬搶胡的味道，反映中國有銀，同俄國只係講惡有啲唔同，亦證明資本主義社會銀彈比炮彈有用。雖然係咁，要突破大摩MSCI呢條戰線，可能都仲需要繼續做工夫，唔好以為實得。
講番即日市，表面睇乏善足陳，實際長江、和黃一班股東就賺到笑！長實地產(1113) 首日登場，開市造70元，最終收造74.1元，比開市價升4.1元或5.85%，但就撐起港股219點；長和(001) 則挫4.9元或3.99%，收造118元。長和改組，股東獲送一股長實地產，兩隻股份加埋?家值192.1元，距離兩百元大關只係一步之遙，長和主席李嘉誠改組，市值暴增接近80%，創富威力絕對驚人。
長實地產一鳴驚人，恒生指數收報27657點，升190點；國企指數收報14114點，跌86點，成交金額1505億元。其他地產股都略為向好，有茶友話如果長實地產可以企穩呢個價，咁其他地產股會唔會都有可能受惠呢？
大摩唱淡莎莎
摩根士丹利發表報告，睇淡莎莎(178) ，目標價只有2.6元。報告認為，受港元跟美元強勢，來港旅客增長變得呆滯，加上三至四線旅客持續來港，令平均每位客戶消費下滑，損害平均售價增長。莎莎面對內地免稅店競爭，而持續錄得虧損的內地網上業務雖然虧損收窄，但預計2016年第四季收支平衡的目標難以實現，sasa.com銷售增長只有單位數，比網上同業明顯落後，預料2015財年純利只有7.67億元，唱到佢前景相當唔靚仔。
陸羽仁
金融High Tea 舊文