異動空間：衝入火場搶粒糖
港股交投逐日遞減，反映大戶逢高出貨，沽完唔再買番，聰明錢家陣係咁做，並已形成趨勢，戰友可以靠邊站，但不能對著幹，真係睇錯絕對大把機會追番，不用擔心。呢幾日經常聽到「人棄我取」、「別人恐慌時我貪婪」的觀點，叫人趁低吸納，但睇中最多贏多少少，萬一睇錯輸到high
high，唔抵博囉！出面槍林彈雨，就算自問好打過宇宙最強，家陣都應該避戰，守得穩才是真高手。A股已變植物市，港股悶局難破，莊家乘機將低殘股炒上去，派得幾多得幾多。明白莊家動機仍衝入火場賺粒糖，只能說祝君好運。殘股就炒上去散貨，至於炒到幾百億市值嘅，就梗係向下減價請君入甕，百靈達（2326）連續兩日隊三成然後掃番上去，大規模派發模式啟動。昨平均成交價0.956元，尾市半粒鐘砌番上1.17元收市，第二日可高位再派，或再頂高啲先派，由莊家話事。
至於中央發萬億金融債谷投資，帶動水泥、基建股反彈，感覺就好似去年炒一帶一路，無倫咁大個願景，真正落到實體經濟又有多少？Anyway，有蟹貨在手的戰友，大可趁此反彈減磅，也未嘗不是一件好事。
魏力
http://www.facebook.com/2012jason
魏力
異動空間 - 魏力 舊文