金融High Tea 2015年8月7日
財技唔易玩
2015年08月07日
美國聯儲局官員打開口牌，認為九月份加息條件成熟。在息口待變同內地A股浮沉下，投資者好多抱住少做少錯心理，靜待局勢發展，呢啲時間係考驗股民耐性的時間。
股市一年開二百幾日，但唔會日日熱火朝天。今年第二季個市咁旺，依家有啲
一節淡三墟感覺。藍籌股唔多郁之餘，一度活躍搶晒鏡的概念股，好多都靜咗落嚟。
好似因為馬雲入股的瑞東集團(376) 呢排就炒風收斂。昨日佢公佈截止6月30日止6個月業績，半年營業額錄得1.22億元，按年大增加245%。但半年虧損卻由上年同期4305萬元，擴至5218萬元，每股虧損11.45仙。期內來自金融資產綜合其他虧損淨額，由2014年的1390萬元，增至4800萬元，反映股票持倉公平值虧損，導致集團中期虧損擴大，好明顯公司都因為個市急插損咗手。
瑞東投資帳面損手
瑞東半年營業額大增至1.22億元，增長主要來自顧問及諮詢服務，有關收入約1.124億元，佔期內總收益達92%；證券經紀收入則約為910萬元，佔期內總收益的比例，由2014年的21%縮至7%，傳統業務睇嚟應該受惠於股市暢旺，出現虧損主要同投資有關。
瑞東解釋，業績見紅主要由於按市值計算錄得中期未變現虧損。投資組合中最大部份持倉的公平市值跌幅超過40%，有關金融資產虧損主要來自年中內地股市大幅急瀉，從高位跌逾三成。不過，管理層認為中國基本面未有轉差，內地再次暫停招股上市，將對香港在接納公司上市方面會發揮更大作用，意味着市場會營造不少新機遇，公司因而會觀望靜候適當時機再進場。
瑞東今年6月引入馬雲為股東，市場憧憬公司會獲注資，股價因而爆升，所以中期業績賺蝕幾千萬，嚴格而言並唔重要。不過，瑞東老闆本身係財技高手，都話諗唔到大陸市況急跌，可見市場風雲變幻真係好難估，財技唔易玩。整個變身過程中，暫時最醒目係趁復牌初期股價暴漲時，沽貨套現咗兩億元的先豐服務(500) ，至於高位追入的股民，依家唯有耐心等待，睇吓公司幾時有動作嘞。瑞東在宣佈馬雲入股後最高去到25元，昨日升3.4%亦只係得13.42元，比高位差不多唔見咗一半。
大市方面，港股缺乏買盤支持下，大部份時間在24400點附近徘徊。恒生指數收造24375點，跌138點；國企指數收報11093點，跌32點，成交減至673億元。
瑞信報告鋤低騰訊
無重大消息下，個股跟隨大行報告上落。瑞信降騰訊(700) 目標價至180元，全日跌1.1%，造140.9元，質低恒指25點。港股成交奀，港交所(388) 跌0.7%，造205.2元；前日被摩根大通降目標價的利豐(494) 進一步下滑，為表現最差藍籌股，造5.47元，挫4.2%。野村升港鐵(066) 目標價5%，因料中期業績表現省鏡，收造35.25元，漲1.73%，為表現最佳藍籌，不過，港鐵受工程延誤影響，升勢唔知可唔可以持續。
收市後，電盈(008) 公佈截至6月底止中期業績，核心EBITDA(未計利息、稅項、折舊和攤銷前利潤)增加30%至57.84億元，反映於2014年5月完成收購CSL後成功整合業務，而電訊及媒體業務EBITDA有增長，媒體業務收益由去年14.87億元增加7%至15.9億元，EBITDA升1%至1.82億元，收益增長受惠於核心收費電視業務收益及OTT等新業務發展收益上升。電盈條電視數砌得幾靚，相比之下，有線寬頻(1097) 中期虧損擴大到1.21億，當中收費電視的EBITDA去年賺7100萬，到今年上半年蝕2700萬，條數又肉酸好多。
陸羽仁
金融High Tea 舊文